Su tribunale de Milanu at atzetadu su cuncordadu propostu dae CIN-Tirrènia: in custa manera est dàbile meda chi sa sotziedade si sarvet. Sos traballadores sunt cuntentos e pro custu istiu sos trasportos intre Sardigna e terramanna podent sighire una genia de connotu. Naradu gasi paret totu sarvu e acontzadu, ma no est gasi.
Su problema chi si nch’est ismanniende pertocat sos prètzios de sos billetes chi sunt artos meda de a beru. Sas resones sunt duas: Tirrènia at refudadu sos agiudos de s’Istadu pro sa continuidade territoriale e sa cuncurrèntzia intre sas cumpannias marìtimas no paret galu tzucada. Bènnere in Sardigna est gastosu meda e non b’at prus iscontos pro sos sardos: gasi semus totu turistas.
Sos problemas de tzucadas a trigadiu o de navios betzos e male postos non sunt sanados, forsis cun duos navios mannos e noos chi sunt benende dae Tzina s’oferta at a megiorare, ma su problema de sos prètzios abarrat grae, mescamente pro chie depet biagiare pro fortza (maladia e traballu) e non pro disaogu. Est gasi mannu chi si nche sunt pesados fintzas sos parlamentares sardos chi ant preguntadu a su guvernu carchi risposta in prus.
Finas a dae in antis de sa pandemia Tirrènia e Grimaldi fiant a prima, paret istranu chi si potzant èssere postas de acordu pro non si fàghere sa gherra, forsis però ambas duas cherent balangiare prus chi podent pro prenare sas càscias isboidadas dae su Covid. A bi pèrdere semus nois sardos chi semus aorados e assolados, e non pro neghe de èssere in un’ìsula, ma pro sèberos polìticos. Pro fortuna como semus in istiu e s’Itàlia s’ammentat de nois e tando si nde faeddat, ma si custa est s’andanta ite at a capitare in atòngiu e in ierru sena s’òbligu de mantènnere sas rotas in continuidade territoriale?
(redatzione)
Leave a comment