Sa limba no est gigante

Cantu b’at postu a nàschere sa fundatzione Mont’e Prama pro more de sa gherra polìtica pro cumpònnere su Cda l’ischimus. Su chi non semus carculende prus est su tempus coladu dae s’aprovatzione de sa 22 in contu de polìtica linguìstica regionale. Fiat su 3 de làmpadas de su 2018. Tres annos intreos nch’at coladu. Ma custa lege, ammentemus·nos·lu, faeddat de 45 dies de tempus, dae tando (artìculu 8.3), pro nominare sos cumponentes de sa Consulta pro su standard. Perunu decretu presidentziale b’at, e duncas nemmancu nòmenes. Est a nàrrere (in prus de s’assessore e de su dirigente regionales cumpetentes) àteras 32 personalidades: bator rapresentantes de sos entes locales inditados dae su Cal e dae s’Anci; bator cumponentes inditados dae sas universidades de Tàtari e de Casteddu; dòighi espertos inditados dae su Consìgiu regionale e dòighi espertos inditados dae sa Giunta. Semus faeddende de gente meda, de unu nùmeru meda prus mannu de su Cda de sa fundatzione Mont’e Prama. Pro ite tardat sa Regione a si mòere? Pro ite non b’est galu su decretu de su Presidente? Ca si sunt gherrende pari-pari pro sos nùmenes o ca non nde lis afutit nudda a nemos? màuru piredda