Su primu in Ogiastra e in sos primos de totu sa Sardigna, su Comunu de Irbono, dae inoghe a carchi chida at a ghiare su progetu: “Su bilinguismu: unu modellu culturale e un’istile de vida”.
Fatu paris cun s’Istitutu de istùdios e de chircas C. Bellieni de Tàtari, su progetu punnat a intervènnere in su logu, traballende paris cun sas famìllias, sos comunes, sas bibliotecas comunale, sas ludotecas, pro addilire e ismanniare una cussèntzia bilìngue in totue, leende sa limba naturale de sos sardos pro limba primària in ue fundare sos protzessos de formatzione e de imparu linguìsticu culturale moende dae sos impreos linguìsticos fitianos.
Sos comunes chi lis pertocat custu progetu sunt noe: Irbono, Baunei, Àrthana, Gàiru, Tortolì, Triei, Elini, Lotzorai e Talana.
Su traballu previdit mustras de arresonadas, cunvegnos, seminàrios, cursos de annoamentu e de formatzione pro maistros, operadores linguìsticos, giòvanos, babbos e mamas, a pitzu de sa promotzione de sa limba sarda e de sa comunicatzione bilìngue.
Cuntentu mannu s’assessore de sa Cultura de sa Comuna de Irbono Giuanne Luisi Serra e sa cussigera de majoria Agnese Stochino: “isetamus sos cunvegnos e sos seminàrios chi ant a fàghere sa prof. Antonella Sorace de s’universidade de Edimburgu, su porf. Micheli Pinna de s’Istitutu Bellieni de Tàtari e sa Dot. Mariantonietta Piga de s’ULS de sa Provìntzia de Nùgoro”
