In custa pagu rigas presentamus unu ritratu mìnimu de sos tres sardos chi ant tentu unu ruolu mannu in su 28 de abrile de su 1794.
Vincenzo Cabras, nàschidu in Tonara in su 1732 e mortu in Casteddu in su 1809. Avocadu, crìticu cun sos piemontesos pro no àere reconnotu su ruolu de sos sardos in sa difesa de s’Ìsula dae s’atacu frantzesu de su 1793, lassende·ddos foras de sos prus incàrrigos importantes. Cun su passare de su tempus aiat leadu positziones prus moderadas, tantu de finire sa vida comente presidente de sa Reale Società Agraria e Economica de Casteddu.
Efisio Pintor Sirigu, nàschidu in Casteddu in su 1765 e mortu semper in sa capitale in su 1814. Issu puru, che a Cabras, fiat avocadu e de Cabras fiat ghènneru. A s’atividade de giurista uniat sa de poete. Che a su sogru fiat passadu a sa fine a s’ala moderada.
Vincenzo Sulis, nàschidu in Casteddu in su 1746. Popolanu, aiat gherradu in sa difesa de Casteddu contra a sos frantzesos e fiat unu de sos capos rivolutzionàrios de su 28 de abrile. In sa vida sua aiat fatu su butegheri e a coa s’avocadu. A pustis si fiat unidu a sos moderados, ma a coa dd’aiant arrestadu cun s’acusa de àere organizadu ateruna rebellia antipiemontesa. Nche dd’aiant inserradu, pro prus de binti annos, in sa turre de S’Alighera chi como est connota cun su nùmene suo. A pustis de àteros annos de presonia est mortu in Sa Madalena in su 1834, pòveru comente fiat nàschidu.
(redatzione)
Leave a comment