S’annu coladu, in su Càucasu, dae su bintisete de cabudanni a su noe de santandria b’est istada una gherra intre s’Armènia e s’Azerbaigiàn, pro su controllu de una repùblica indipendentista, sa de su Artsakh, a majoria armena. Su Azerbaigiàn at atacadu s’Artsakh dae duos oros e s’Armènia, chi l’at amparada, at pèrdidu.
Su Azerbaigiàn est unu Paisu ricu pro more de su petròliu e ghiadu dae unu presidente, Ilham Aliyev, reconnòschidu dae s’imprenta internatzionale comente unu ditadore. Su Paisu est ligadu meda cun sa Turchia, ca tenet una limba assimigiante meda e ca est musulmanu. S’Armènia, a su revessu, est unu Paisu cristianu, cun paga populatzione e chi non est gasi ricu, ma est reconnòschidu dae sa comunidade internatzionale comente uno de sos prus democràticos de s’Ex-URSS e ligadu mescamente cun sa Geòrgia. Sa repùblica de s’Artsakh tenet una majoria armena, e su territòriu suo est istadu dae semper de cultura armena. At votadu s’indipendèntzia in su 1991, cando s’est isorta s’unione soviètica, e si nche est guvernada a sa sola dae cuss’annu. Sos ligàmenes cun s’Armènia, est òviu, sunt astrintos meda.
Sa gherra de invasione est istada cundennada dae sas istitutziones internatzionales e minetzat de no agabbare cun cussa de su 2020. S’Armènia tenet una cultura, una religione e una limba diferente. Pro s’amparare si nche est acostiada a sa Rùssia. Ma como chi est dèbile, in mesu a duos Paisos ricos chi si cherent ismanniare, comente sa Turchia e s’Azerbaigiàn, est in arriscu de betare àteru sàmbene.
Unu perigulu chi at ischidadu sos disterrados armenos chi, pro neghe de su genotzìdiu, sunt ispartzinados in Europa e Amèrica. Calicunu est torradu a domo pro cumbatare in s’esèrtzitu, sos àteros si nche sunt mòvidos pro incungiare dinari pro agiudare su Paisu de nàschida. Mescamente sos artistas, sos iscritores e sos cantadores si sunt impinnados pro custu. Intre custos ùrtimos b’at unu grupu musicale metal famadu in totu su mundu, sos System of a Down, chi si nche fiat isortu dae annos medas. Pro more de custa gherra si nche est torra aunidu e at publicadu unu discu, Protect the Land/Genocidal Humanoidz, pro interessare sos sighidores issoro e crèschere sos dinari dae donare a s’Armènia.
(redatzione)
Leave a comment