"S'incontru" de Elisa Carta, unu ponte intre sas culturas

Est in pessu essidu “S’incontru”, discu de sa cantante sarda Elisa Carta. Deghe sas cantzones presentes in custu traballu: “S’incontru”, “Chin donzi peraula”, “Melagranada ruja”, “Maja”, “Mesu caminu”, “Fue”, “Su chi mancat”, “Occhi grigi”, “Efisio Concas”, “Goceano”. Custu discu lompet a pustis de annos de chirca funduda in sa cultura de sa terra sua. Issa etotu narat chi «su disìgiu de custu progetu est su de ispainare in totue sa fortza de sa limba sarda colorende sas istòrias de sa terra sua cun elementos sonoros chi arribant dae partes diferentes de su mundu». In sa produtzione de custu discu ant afiancadu a sa cantante unos cantos artistas de primore che a Pacifico, Ernesto Nobili, Francesco Piu e Michele Pio Ledda. Su discu, in prus de lu comporare, lu podimus ascurtare in sas mègius prataformas de mùsica digitale (redatzione)