Oe est essidu a campu su censimentu demogràficu de s’ISTAT (inoghe) e sos datos de sa Sardigna assuconant: su 2020 s’est abertu cun 1.610.272 abitantes de Sardigna e at agabbadu cun 1.598.225. In unu annu s’ìsula at pèrdidu prus de deghe mìgia residentes. Gente si nche est andada, meda, a dolu mannu, si nche est morta fintzas pro su Covid e de pitzinnos non nde naschent prus. Sos natos bivos in Sardigna sunt semper su mesu, e fintzas de mancu, de sos mortos. Sas criaduras noas non bàrigant mai sos otighentos a su mese, sos mortos bàrigant a s’ispissu sos mille e chimbighentos.
Su saldu migratòriu de gente chi andat a fora e gente chi benit est semper malu, ma a s’agabbu de s’annu sos datos parent megiorende unu pagu, forsis ca su Covid at postu a tìmere chie cheriat tzucare. In Sardigna paret chi non si siat intesu meda s’efetu de su Covid in sas nàschidas, nessi in s’annu coladu: sa diferèntzia de sas nàschidas de s’inghitzu de s’annu cun cussas de s’agabbu non est gasi manna. S’àteru datu chi assuconat est sa lestresa cun sa cale est capitende: in su 2013 sa Sardigna contaiat 1.663.859, prus o mancu sessantachimbe mìgia de sardos in prus. Una tzitzade prus manna de Nùgoro e de Terranoa chi non est prus inoghe.
Calicunu at a nàrrere chi est neghe de su èssere un’ìsula e de su tretu mannu de mare chi nos partzit dae Terramanna. Però su chi balet pro nois non balet pro àteras ìsulas de su Mediterraneu: Corsica e Malta, pro esempru, sunt creschende siat pro su chi pertocat su dinari siat pro su nùmeru de abitantes. Su problema nostru est in àteras cosas e non in sa geografia, ma si non si sanant luego, amus a iscumpàrrere non petzi comente cultura, ma finamentas comente populatzione.
Gabriele Tanda
Leave a comment