Sa zona arantzu est una realidade, ràntziga. Su ministru Speranza at firmadu s’ordinàntzia chi nos nche ponet in pare cun àteras regiones cun “arriscu moderadu” (pro como nch’ant bogadu sa fàscia groga). Ma sa noa de gianteris, mancari siat colada comente lòmpida de repente, gasi noa non fiat. Sos matessi giornales sardos de chenàbura a mangianu nos presentaiant sos datos de sa fundatzione Gimbe cun una crèschida, mancari no a lestru, de s’ispainada de sos cuntàgios. E sa Regione, chi pro seguru ischiat de custa mudada cando chi fiat emitende s’ordinàntzia pro impedire sa lòmpida de sos “non residentes” a sas segundas domos issoro, non paret chi siat in idea de fàghere recursu comente fadeit cando galu bi fiat Conte a caddu (como devent finamentas pensare a su “piano casa” a pustis de su Nono dae Roma). In s’ìnteri semus male postos a livellu de campagna vatzinos (non pro neghe de sos No Vax o de sos dudosos de s’AstraZeneca) e su monitoràgiu de sos positivos “Sardi e sicuri” non resesset a cuntènnere s’ispainada: pagu gente a si fàghere su test e positivos chi no lu sunt prus a pustis de su moleculare (e baddu a l’ischire cantos sunt sos negativos farsos, a dae chi pro cussos non b’at iscumprou). Non faeddemus de sos controllos in sos portos e in sos aeroportos, cun tampones chi non sunt obligatòrios e cun protzeduras chi lassant aberta cale si siat possibilidade de cundimentu (semper chi su virus lompat dae foras ebbia). A livellu populare agigu de opinione pùblica s’est mòvida (finamentas gràtzias a sos amministradores de sa Corona de Logu e a una petitzione virtuale) contra a sa possibilidade de àere sas costeras comente reparu pro sos possidentes de terramanna, ma su caminu est galu logu e àteros diant chèrrere rugrados. Como podimus finamentas pensare chi est pro more de custas pressiones chi Solinas apat mudadu idea (a dae chi in antis non fiat pro tancare sas ghennas) e chi no apant pesadu àteras variàbiles (sa zona arantzu imbeniente) o dinàmicas (abbolotu in sa majoria sua). E addae de custa zona arantzu chi, de facto, depotèntziat s’ordinàntzia regionale contra a cussas iscostiadas, àtera est sa chistione. Pro pedire chi sos guvernantes regionales fatzant su chi devent in contu de sanidade pùblica e de calidade, no at a bastare una petitzione in Change.org ma istèrridas de ideas. Tocat a mòvere dae chie, in custos annos in pare cun àtere, at dadu sa vida gherrende pro custos deretos. Tocat a mòvere dae su chi nos at lassadu Pierina Cilla. Ca si naramus chi tocat a sos sardos a disinnare su colore, beh, tando cheret chi sos sardos comintzemus a nàrrere ite Sardigna cherimus disinnende totu su restu.
màuru piredda
Leave a comment