Sa CNA (Confederazione Nazionale dell’Artigianato e della Piccola e Media Impresa) sarda at iscritu a sa Regione pro sollitzitare trastes e agiudos pro fàghere pesare s’economia de Sardigna a pustis de custa disaura manna chi est su Covid.
Sas ideas de sa CNA sunt de investire su dinari de su Recovery Plan in sa formatzione de sos traballadores, ma finas de sos chi ghiant sas aziendas e de sos amministradores de su logu; in s’annoamentu de sas atividades e de sa manera de produire; in s’internatzionalizatzione; in s’amparu de su traballu de sos giòvanos e de sas fèminas e in sos mecanismos amministrativos pro los fàghere devènnere prus eficatzes.
S’arriscu est chi sa Sardigna potzat sufrire prus de àteros logos s’emergèntzia ca est lòmpida cun dificultades medas a s’inghitzu de sa pandemia, e su Covid at peoradu sa situatzione. Su chi pedit sa CNA a sa Regione est de pònnere dinari in sos logos mègius pro agiudare s’ìsula non petzi a si torrare a pesare, ma a crèschere pro annos medas. No est una chistione de agiudare ebbia, ma de pensare su benidore econòmicu de sa Sardigna.
Gabriele Tanda
Leave a comment