969 dies

Tenimus una lege, oe, chi, cunforma a sa data de publicatzione in su Buras, est in vigore dae 969 dies. Dae tando, cunforma a su chi cussa lege narat, carchi provedimentu cheriat leadu intro de 45 dies. De intervallos mannos 45 dies nche nd’at coladu prus de 21. E galu, mancari s’art. 8.3 de sa lege 22 de su 2018 faeddet craru, sa Regione sarda no at numenadu sos cumponentes de sa “Consulta de su sardu”. Perunu decretu presidentziale b’at. Duncas custa Regione no est acuntentende cantos diant chèrrere pigare parte a custa consulta pro s’istandard ortogràficu nou. Est a nàrrere (in prus de s’assessore e de su dirigente regionales cumpetentes) àteras 32 personalidades: bator rapresentantes de sos entes locales inditados dae su Cal e dae s’Anci; bator cumponentes inditados dae sas universidades de Tàtari e de Casteddu; dòighi espertos inditados dae su Consìgiu regionale e dòighi espertos inditados dae sa Giunta. A la nàrrere totu canta, custa Giunta no est acuntentende nemmancu a sos chi teniant carchi isetu cun sa ghia polìtica noa sardista: su Csu, mancari acusende s’Udc, pedit a Solinas de mòvere dae sos faeddos de su sardista Piretta in contu de istandard, contra a una polìtica filo dialetale. Solinas duas cosigheddas l’as at naradas in ocasione de sa Die mundiale de sa limba materna, ma pro seguru amus a torrare a intèndere carchi cosa su 28 abrile e posca baddu a l’ischire. Pro seguru b’at un’arretramentu polìticu culturale: non semus faeddende prus de una limba pro s’Europa ma de un’ortografia pro sos sardos. Imbetzes de punnare a unu sardu capatze de èssere sa base de progetos comunitàrios de cambiapare, pro istudiantes e dotzentes de Europa (un’idea de turismu linguìsticu non diat èssere cosa mala), semus punnende a s’ortigheddu de cadaunu de nois, mancari chi istemus repitende chi su sardu est unu e chi nos cumprendimus pari-pari. Est finamentas custa sa chistione, non tantu sa de mudare agigu sa Lsc. E custas visiones polìtica devent essire a campu làdinas cando sos 34 espertos s’ant a oviare: unu standard pro nois e pro s’Europa o duas macrovariantes elevadas a standard pro sighire a èssere mègius regione de Itàlia? Pro cussu diat èssere cosa “buona e giusta” chi sas allegas de custos espertos las trasmitant in sas prataformas sotziales o chi a su nessi dae cada addòbiu boghent a campu unu verbale pùblicu cun sas positziones de cada unu. Finamentas ca de sas cummissiones betzas no est totu su chi ischimus.

mp