“Sos patimentos de unu giòvanu” de Johann Wolfgang Goethe, òpera traduida in sardu dae Manuela Mereu e publicada dae Condaghes in su 2015 (colletzione Àndalas).
10 de austu
Mi la podia godire una vida bella e ditzosa, ma est ca deo so unu macu. No est discansosu a agatare totu paris cuddas ocurrèntzias de pòdere mantènnere allegra s’ànima de s’òmine, comente sas chi deo mi nche so godende como. Est a beru chi petzi su coro nostru nos faghet cuntentos… nche so in custa famìllia dèchida, su babbu mi tenet afetu che a unu fìgiu, sos minores che a unu babbu, e Lotte puru m’istimat!!… E b’est finas Albert, custu òmine primorosu chi mai mi nch’at distrutu su gosu cun mùtrias malas o àteru; prus a prestu mi cheret a amigu corale e deo so pro issu sa persone chi prus istimat in fatu de Lotte! Wilhelm, a beru, est un’ispàssiu a nos bìdere cando semus a passìgiu paris e a nos intèndere chistionende de Lotte: mi paret chi non bi siat in su mundu carchi cosa prus ridìcula de custa, ma a bortas, pensende·bi, mi nche prenent sos ogros de làgrimas.
Mi chistionat tando de sas virtudes de sa mama de issa, de nch’aeret intregadu sos fìgios a Lotte, essende morende, e issa a Albert, e de comente a Lotte l’est intradu un’ànimu diferente e achipende a totu sos doveres de domo nd’est resurtada una mama bona, chi at semper traballadu sena pèrdere mai sa cuntentesa e su sulenu e prena semper de amore pro tutus… Cando passìgio cun Albert nche collo frores cada tantu e renesso a cuncordare unu màtzulu bellu e… a pustis nche los imbolo a su riu e los miro andende·si·nche lèbios in su murmutu de s’abba… No isco si ti nche l’apo giai iscritu chi Albert si nch’at a abarrare inoghe ca at tentu un’incàrrigu dae sa corte, est bene bòlidu e l’ant finas a pagare bene. Deo no l’apo connotu mai un’òmine gosi atentzionadu faghende tratamentos e su contivìgiu mannu chi bi ponet.
Leave a comment