A passu de testùine (in Sardigna prus chi no in aterue) s’mRna de su Pfizer diat dèvere èssere inghitzende a fàghere prodùere sa proteina Spike a sas tzèllulas de is vatzinados. S’eventu de su 27 de nadale, chi in Itàlia dd’ant batijadu comente “Vax Day” (forsis pro non torrare a bogare a campu su “V Day” de Grillo chi, deformatzione professionale sua, at naradu de punnare a una «siringada ùnica»), est oramai acontèssida colada. Una chida a pustis, sas noas chi b’amus pertocant ritardos e iscobertas de abba caente: che a sa de su mèigu positivu a pustis de sa prima dose (comente chi esseret cosa impossìbile a bisu de chie nd’at dadu a ischire). Ma is noas diant pòdere èssere finamentas àteras, ca sa risposta de Franco Locatelli (presidente de su Consìgiu superiore de sanidade) diat dèvere pònnere imbetzes una pedra subra de sas dudas in contu de eficàtzia: «S’amparu immunitàriu dae s’infetzione est cumpletu petzi a pustis de sa segunda dose de vatzinu». Miremus: cumpletu, non «plausìbile» ebbia cunforma a su “bugiardinu”. Isperemus chi gasi siat, tando, ca a como paret cumpleta petzi sa sètzida pro tempore de unas cantas figuras de punta in is prus cadreas mannas de sa sanidade territoriale sarda. E cumpletos, a cantu paret, non fiant sos datos sardos in contu de cuntàgiu. A su puntu chi s’arriscu carculadu est “non valutabile”, est a nàrrere chi non si podet iscumproare, est a nàrrere artu. Paret chi ddoe apat coladu un’era geològica dae cando faeddaìamus de “ìnditze Rt prus bassu de Itàlia” (unu de sos islogan lestros de custu tempus a pustis de “Sardegna covid free”). Immoe ddoe at àteru però. Cras comintzat su screening massivu pro 33mìgia ogiastrinos in intro de su pranu Crisanti. Dae sa Regione narant chi non b’at a àere interferèntzia peruna cun sa campagna parallela de vatzinatzione (e puru su Prof, su chi unu tempus «In Sardigna non b’at bisòngiu de vatzinu», si l’at fatu, su vatzinu). A bìdere istemus immoe comente at a protzèdere su restu. Su chi diat èssere de giudu est a ischire si a palas de sas decraratziones b’at disinnos e atziones o petzi tzarra. A largos annos.
màuru piredda
Leave a comment