Calicunu tenet galu s’idea betza chi sa criminalidade sarda est ligada a su pastoriu, a carchi isrobatòriu e pagu de prus. Ma oramai sos telegiornales e sos giornales faeddant semper de prus de fundos de cànapa rechisidos dae sa politzia o da sos carabineris, e de droga agatada in carchi naviu chi benit dae Terramanna, o in carchi domo o cuile. Sa Sardigna, est craru, est divènnida unu logu de produtzione de marjuana e unu logu de tràvigu de sa droga chi andat in àter’ue.
Ispricat bene sa realidade de sa droga in Sardigna sa Relata Annuale a su Parlamentu a subra de sas tossicodipendentzias (inoghe). Sos nùmeros chi bi sunt a intro sunt craros, mescamente ca sunt carculados cada chentu mìgia abitantes. In Sardigna b’at su nùmeru prus mannu de fundos de cànapa rechisidos: 3.270 chilos pro cada chentu mìgia abitantes. Sa mèdia italiana est de 493 chilos. Sa droga, cale si siat, rechisida in Sardigna est de 210 chilos (semper pro chentu mìgia abitantes) in Itàlia sa media est de 120 chilos. Est gasi fintzas pro s’hashish rechisida: 43,3 chilos cada chentu mìgia. Sa mèdia italiana est de 20,5 chilos. Calicunu at a nàrrere chi est neghe de sos immigrados, ma sos datos narant su revessu: su noranta pro chentu de custos reatos est fatu dae gente chi at sa tzitadinàntzia italiana. Un’àteru datu tristu meda est su record sardu de sos mortos pro overdose: 23 mortos cada millione de abitantes, su prus artu de s’Istadu italianu.
Sa faddina manna chi si podet fàghere est de pensare chi su coltivu de cànapa est cosa de pagu contu. Cussa atividade, in una cantidade gasi manna, no est petzi pro su mercadu sardu, ma tenet sa punna de sa bèndida a fora de s’ìsula cun s’agiudu de sa criminalidade organizada. Custu cheret nàrrere chi sa Sardigna est intrende in s’atentu de sas màfias italianas, e custu est unu problema sèriu e de importu. Unu tratòngiu chi est cunfirmadu dae su tràvigu in sos portos e aeroportos sardos de àteras genia de droga, chi lompent in Sardigna pro si nde tzucare in àter’ue o pro ochiere sardos. Sa produtzione de sa marjuana est, cun probabilidade manna, ligada a sa colada de sas àteras droga.
Podimus pensare chi meda de sa neghe est de sa crisi chi est atoghende s’economia de campagna e de su pastoriu. Chi est neghe de s’Istadu chi no est capatze de dare àteras manera de fàghere dinari. Forsis est fintzas beru, ma su fatu est chi s’economia de sa droga est una chi faghet dannu meda e cun un’arriscu mannu, ma cun unu balàngiu prus ampru e fàtzile de cale si siat atividade.
B’at chistiones medas chi s’aberint a custu puntu. Sas màfias italianas a ite puntu sunt intradas in s’economia sarda? Ite nos depimus isetare in su benidore de sa Sardigna dae custa casta de tràfigu? Ma mescamente, sende chi s’Istadu est legalizende a bellu a bellu su mercadu de sa marjuana, no est possìbile chi sa Regione potzat impressare sa legalizatzione de su coltivu de sa cànapa in s’ìsula nostra, gasi da nde lu bogare a sas màfias? E si at a acontessere, cale podent èssere sas cunseguèntzias?
(redatzione)
Leave a comment