Sa chida colada non si nch’est interinada dende·nos noas de giudu. Sos datos publicados domìniga a merie inditaiant 663 casos noos de cuntàgios. Ma de custos 633, su bonu (491) beniat dae sa provìntzia de Nùgoro. In intro de custa tzifra no ischimus cantos fiant sos casos de cussas 24 oras e cantos sos casos betzos chi no aiant contegiadu in antis. Cada mèdiu de informatzione, movende dae sa matessi fonte, gasi essiat domìniga 13 (lu lassamus in italianu): «L’incremento del numero di casi positivi accertati comprende un riallineamento del dato della provincia di Nuoro, relativo al periodo precedente». Ma no est chi no ischimus ebbia comente cheret chirriada cussa tzifra (491); no ischimus nemmancu ite cheret nàrrere «periodo precedente»? Cando comintzat? Cando finit? Como semus a concruos de custa, de chida, cun datos chi non sunt mègius: 380 cuntagiados e 9 mortos eris.
de Màuru Piredda
Custos sos datos de sa chida: lunis 228 cuntagiados e 11 mortos (2312 tampones); martis 231 cuntagiados e 12 mortos (3604 tampones); mèrcuris 405 cuntagiados e 23 mortos (5601 tampones); gioja 268 cuntagiados e 11 mortos (4025 tampones); chenàbura 285 cuntagiados e 10 mortos (4741 tampones); eris, sàbadu, 380 cuntagiados e 9 mortos (4068). Su raportu intre casos de positividade e test efetuados no est mai che pare: su de eris, 9,34, est pagu de suta a su de lunis, 9,86%, ma dae martis a chenàbura nch’est faladu fintzas a su 6,01.
Però nche semus semper in pertzentuales chi dant anneu: «Unu tassu de positividade intre su chimbe e su deghe – narat Patrizio Pezzotti, diretore de su repartu de epidemiologia de s’Istitutu superiore de sanidade – cheret nàrrere chi non si resesset prus a signare bene meda e nos cuntzentramus in sos sintumàticos sena nche lòmpere a sos asintumàticos, chi sunt sos chi difundent de prus su cuntàgiu».
Àteros datos: sunt 533 sos patzientes ricoverados in repartos non intensivos (14 in mancu cunforma a su die in antis) e 52 (-1) sos malàidos graves in terapia intensiva (4 sas intradas in sas ùrtimas 24 oras). E nche semus semper addae de su datu crìticu (duos puntos subra su 30%). Cara a 28.075 casos de positividade registrados dae su comintzu de sa pandemia sunt 11.504 in totu (+287) sos patzientes sanados (est a nàrrere sos chi nche colant sos sìntumos de s’infetzione e chi resurtant negativos in duos test s’unu in fatu a s’àteru a 24 oras de distàntzia); àteros 242 sos sanados clinicamente (est a nàrrere sos patzientes chi, a pustis de àere presentadu manifestatziones clìnicas assotziadas a s’infetzione, devenint asintomàticos pro risolutzione de sa sintomatologia, ma podent galu resurtare positivos a su test pro sa chirca de su Sars-CoV2).
Posca bi sunt sos chi non diamus chèrrere. E, sena ischire si oe bi nde dêt àere, dae lunis a eris sunt 76 sas persones chi si nche sunt mortas. 83 in sas ùrtimas sete dies. Nùmeros chi nos dant podda a los repìtere mancari sa chistione non paret ispantende·nos. Unu disacatu umanu e cognitivu.
In s’ìnteri, comente amus pòdidu lèghere in sa Nuova de chenàbura, «dae su 2 de nadale est isparèssida cada informatzione ufitziale chi pertocat sa signadura de sas persones in cuntatu cun sugetos resurtados positivos. Si finas a pagu tempus a como sos bulletinos de s’Unidade de crisi marcaiant sa distintzione intre casos reconnotos a pustis de sa cunfirma de unu “suspetu diagnòsticu” e a pustis de s'”atividade de screening”, dae 16 dies nos comùnicant su nùmeru de sos positivos sena distintziones. E si sa signadura de sos cuntatos fiat pro seguru unu mètodu de giudu pro limitare sos cuntàgios, s’idea chi si potzat èssere arreada dae duas chidas non nos est de cunfortu. Su cummissàriu de s’Ats, Massimo Temussu non lu cunfirmat ma nemmancu lu negat sutalineende sas dificultades de su sistema informàticu chi collit sos datos».
Gasi etotu est pighende podda sa prataforma dedicada a sas comunicatziones indiritzadas a sos sìndigos. Est su sistema chi diat permìtere a sos primos tzitadinos de àere unu cuadru agiornadu de su nùmeru de positivos e de sos barantinos. Intro de su 15 bi deviat èssere sa cobertura totale de sos 377 Comunes. Sa Nuova de su 18 gasi nos contaiat: «Finas a su sero de eris lu podiant consultare petzi sos sìndigos de sas Asl de Casteddu, Carbònia e Seddori».
E totu custu sena cunsiderare sa chistione de sas residèntzias pro sas persones mannas. «Milli antzianos positivos – titulaiat s’Unione mèrcuris -. Su virus si nch’isparghet peri sas domos de pasu». «Chimbe mortos in Xèrxei, ses in Nuràminis, duos in Ìsili, tres in Nùgoro e in Bòrore: sos nùmeros chi lompent a sos giornales custos sunt. Ma pagu (o nudda) s’ischit de s’undada de cuntàgios chi nos ammentat su modellu terrìbile de sa Lombardia in sa prima fase Covid».
Sa timòria, duncas, est chi, pranu Crisanti o mancu, sa màchina regionale non funtzionet comente diat dèvere in custu perìodu chi est aberende una fase noa cun sa campagna de vatzinatzione (isperende chi su virus non mudet in peus).
Pro como paret funtzionende sa parte burocràtica, mancari cun carchi remèdiu. Che a su chi nos contaiat sa Nuova su 17: «Sa Giunta no at a isfrutare totus sos 12 meses, ma una parte manna emmo, mescamente pro sa fase de transitzione dae sa gestione cummissariale a cando s’ant a dèvere numenare sos diretores generales de sas oto Aziendas sanitàrias e de s’Ares. Ca, in s’ìnteri, s’albu natzionale l’ant a torrare a abèrrere dae su ministèriu permitende gasi s’iscritzione de unos cantos aspirantes diretores generales agradèssidos a su tzentru-dereta».
E in mesu a s’allega bi semus nois. A nos lamentare de sa serrada natalìtzia? “Ci può stare”, comente nargeit un’assessore. A criticare Regione e Guvernu? Mai manchent sas crìticas! Ma diamus cara a comente amus a èssere a comintzos de annu nou, pro gasi!
Leave a comment