A Nadale s’inghitzat a pensare a ite donare a sos de famìllia, in su mentres àteros sunt chirchende comente firmare su Coronavirus. Angela Merkel at giai seberadu: sa Germània serra totu pro unu mese. S’Inghilterra est fatende su matessi. Sa Frantza? No, cussa est pensende a dare a sa cua unu prèmiu a unu ditadore, ma est un’àteru chistionu. E s’Istadu italianu ite est meledende de fàghere?
Sos nùmeros de sos malàidos sunt torra creschende die cun die, e tando sas festas e sa gana de istare totus in paris sunt un’arriscu mannu. Su guvernu est valutende de torrare a serrare totu cantu, ma forsis nono, serrare emmo, ma unu pagu de prus de prima, ma unu pagu de mancu de comente fìamus in martzu e abrile. Su sèberu est difìtzile meda ca si nche est proende a sarvare economia e salude, de corpus e de conca, de sos tzitadinos de s’Istadu italianu.
Sa proibitzione de colare dae comuna a comuna forsis non si faghet prus, ca si sunt serados chi fiat una faddina. De su restu colare dae Frussio a Tinnura chi in paris non lompent a milli persones e sunt aunidos, no est comente colare dae unu bighinadu a s’àteru de Roma o Milanu. Ma bisòngiat de nàrrere chi su problema est chi istare in paris, mescamente in famìllia, como est perigulosu. Su guvernu cheret disanimare cussu, ma non resesset a agatare una manera pro lu fàghere chi sigat sa lege e chi siat compidabile. Finas ca pònnere fide in su tinu de sa gente non est dende resurtos mannos.
Custu gròmuru de dudas, dificultades e impreparatzione non est agiudende ca sa gente est infadada: cheret festare, essire e bìvere. Torrare a sa vida de un’annu a como. Fintzas su sentidu pro sos mortos imbetzes de pònnere a tìmere, a s’ispissu paret chi siat ischidende de prus sa gana de si disaogare. De su restu fìamus divènnidos una cultura chi non fiat prus avesada a chistionare de morte e maladia, e como, totu in una, si nche est agatada a non intèndere de àteru. E sa bògia de fuire, mescamente in sas traditzione e in su barigadu, est manna.
Amus a bìdere ite amus a agatare a suta de s’àrbore de Nadale, chi de seguru cust’annu at a èssere lughente unu pagu de mancu.
(redatzione)
Leave a comment