Lodè-Torpè
Sa nova est de sas chi ti lassant sena alenu perunu: una norma proposta pro sas àreas sìsmicas diat impònnere a sa Regione de isboidare bona parte de s’abba chi b’est in sas digas sardas. Si sa norma at a èssere aprovada sena emendamentu perunu, sa Sardigna arriscat de dèvere imbolare a mare prus de unu milliardu e mesu de metros cubos de abba. Dae su situ de sa Regione si benit a ischire in una nota chi in die de eris, su 8 de maju, s’Assessore de sos Traballos Pùblicos Angela Nonnis at addobiadu in Roma su diretore generale de su Servìtziu Natzionale de sas Digas, chi faghet parte de su ministeru de sas Infrastruturas ghiadu dae Maurìtziu Lupi, de su PDL. Sa cajone fiat pròpiu su de li presentare sas problemàticas chi custa norma diat àere in totu s’ìsula: mancàntzia de abba pro sos impreos tziviles, pro sas atividades agrìculas e imprenditoriales e fintzas pro atividades chi ant ligàmenes cun punnas noas de crèschida, mescamente pro sas energias rennoàbiles.
Su chi ispantat de custa atzione de guvernu est chi sunt colados pagu prus de tres annos dae cando una cummissione de su Senatu naraiat, pro mèdiu de su Professore Enzo Boschi chi “la Sardegna è l’area italiana migliore per la costruzione di centrali nucleari, perché è la più stabile dal punto di vista sismico“. Dae Roma su messàgiu tando paret craru: diant sentire a su coro si diamus mòrrere in suta de s’abba, ma non diant fàghere nudda si diamus mòrrere de tumores chi benint dae sas tzentrales nucleares.
Tando est pro cussu chi b’at gente chi si nde afutit de Chirra, de Portovesme, de Otzana e gasi a sighire? Mègius a l’ischire….