Su 10 de nadale cumintzat sa de 15 editziones de su Sardinia Film Festival, sa manifestatzione tataresa dedicada a sos curtzumetràgios. Finas a su 15 de su mese ant a partetzipare 60 pellìculas dae totu su mundu, seberadas intre 3155, partzidas in animatzione, fiction e documentàriu.
De signalare chi 23 òperas sunt realizadas dae registas esordientes. In sos filmis sunt finas presentes atores connotos, che a Miriam Leone, Corrado Guzzanti, Ivano Marescotti, Pierpaolo Spollon e Luciana De Falco.
Ddo’ant a èssere duas giurias. Sa giuria tècnica de su festival est cumposta dae sa segretària de editzione Fiorella Giovannelli Amico, dae su regista Marco Antonio Pani e dae su distribudore tzinematogràficu Andrea Paco Mariani.
Sa giuria istudiantes imbetzes est cumposta dae 15 iscolanos de: Liceo Artistico Figari, Agrario Pellegrini e Liceo Margherita di Castelvì de Tàtari, cun su coordinamentu de su professore Stefano Sole.
In prus at a èssere possìbile, tràmite sa prataforma Zoom, a partetzipare a tres master class, su 12, su 13 e su 14, semper a sas ses de sero.
Su tema de sa prima est Distribuzione cinematografica indipendente cun Andrea Paco Mariani, chi at fundadu sa domo de produtzione SMK Factory e sa OpenDDB, sa prima prataforma VOD europea dedicada a su tzìnema indipendente cun lissèntzia Creative Commons.
Sa segunda est afidada a su regista sardu Marco Antonio Pani, cun su tìtulu Regia nel cinema del reale. Pani est autore de Capo e croce. Le ragioni dei pastori e Il maialetto della Nurra.
In fines, sa de tres bidet comente protagonista Fiorella Giovannelli Amico, chi at a faeddare de I mestieri del cinema: la segretaria di edizione. In sa carriera sua si podent ammentare L’Ultimo Imperatore de Bertolucci e Tu mi turbi, de Benigni, in ue at traballadu comente assistente a sa regia.
Su festival at a èssere visìbile via internet ebbia a su situ sardiniafilmfestival.it. Sa programmatzione at a cambiare ogna die.
Su Sardinia Film Festival, chi su diretore artìsticu est Carlo Dessì, est organizadu dae su Cineclub Sassari. Durante s’esistèntzia sua at bidu sa presèntzia de registas de livellu mundiale, che a Aleksandr Petrov, animadore russu prèmiu Oscar in su 2000 pro Il vecchio e il mare, Andrej Končalovskij, issu puru russu, connotu in otzidente massimamente pro Tango&Cash, e Béla Tarr, autore intre sos àteros de su filmi Sátántangó.
Inoghe in bassu sos inditos pro chie cheret partetzipare a sas master class:
12 de nadale, cun Mariani:
Zoom https://us02web.zoom.us/j/88484029485?pwd=c3pIUGdVd0tmNndGQ0RLbENkeTFTZz09
ID riunione: 884 8402 9485
Passcode: 178365
13 de nadale, cun Pani:
https://us02web.zoom.us/j/83411875400?pwd=NHhYbzJjYzhwNGNKUWlTTWkrNjI5QT09
ID riunione: 834 1187 5400
Passcode: 278557
14 de nadale, cun Giovannelli Amico:
https://us02web.zoom.us/j/88458305558?pwd=YWQwSzVxS0lqR3VweE1aK2xBc2Fidz09
ID riunione: 884 5830 5558
Passcode: 575155
(gianni muroni)
Leave a comment