– de Salvatore Serra –
Polìtica linguìstica cheret nàrrere finas a fàghere giornales in sardu, pro afortire sa capatzidade de custa limba de operare cun unu registru artu.
Oe bos presento sa revista “Eja”, publicada pro unos cantos annos dae sa sotziedade editoriale “Papiros”.
In custu chi est su primu nùmeru, mese de freàrgiu de su 2010, si faeddat, in mesu de s’àteru, de tzìnema, libros, etichetas in sardu, ràdios comunitàrias, linguìstica, personàgios de gabbale, àteros pòpulos, àteras limbas.
Diretore responsàbile, Fredo Valla.
Diretore editoriale, Diegu Corràine.
Collaboradores de custu nùmeru, Antoni Arca, Diegu Corràine, Sarvadore Serra.
Inoghe b’at unas cantas rias de un’intervista a s’istudiosu catalanu Carles Castellanos.
________
Comente si format, moende dae s’esperièntzia tua, una cussèntzia natzionale trasversale e cumpartzida?
Est unu protzessu longu a beru. In su casu nostru tenimus s’esperièntzia de unidade democràtica contra a su franchismu chi at agiuadu a isvilupare pràticas polìticas unitàrias. Ma tocat finas a tènnere in contu sos annos longos de traballu unitàriu in prataformas sotziales e culturales mùltiplas (organizatziones de defensa de su territòriu, de sa limba e totu gasi). Est importante finas su fatu chi in mamentos diferentes de su protzessu b’apat un’isfortzu de crarificatzione polìtica. In su casu nostru, pro nàrrere, sa formulatzione de sa defensa de su deretu de autodeterminatzione e sa cunchista de s’Indipendèntzia polìtica comente unu protzessu de rotura democràtica, creo chi apat agiuadu meda a reconnòschere unu terrinu comunu a sas tendèntzias e esperièntzias diferentes chi ant confluidu in su movimentu natzionale catalanu durante sos annos…
Leave a comment