Paret chi in Sardigna su Covid siat creschende dae nou, ma paret, a cantu narant sos continentales, chi como sa neghe siat sa nostra e forsis nos tocat de abarrare tancados a intro de sa Sardigna, o a su nessi custa est sa minetza. Ponende a banda sas cuntierras, bi sunt tres maneras de leare custa noa: sa prima est a si la leare cun nois etotu, fatende nostru su pensu de sos continentales; un’àteru modu est a cuntierrare amparende sa veridade de ite est capitadu in custos meses; s’ùrtima est cussa de si serare de cale raportu de poderiu colat intre sa Sardigna e s’Itàlia e dae in ue naschent cussos chistionos. Cust’ùrtima mirada est una parte de importu de cussa chi in medas mutint cussèntzia natzionale.
S’Assemblea Natzionale Sarda (ANS) naschet, mancu un’annu a como, pro ismanniare e ispàrghere custa genia de cussèntzia. Ma comente lu cheret faghere? S’ANS est istada fraigada comente unu giassu in ue si podet chistionare de ideas e de miradas diferentes a subra de sa Sardigna, cun un’organizatzione chi fuet sa possibilidade de devènnere unu partidu polìticu. S’idea chi istat a fundamentu est de un’ìsula indipendente e chi potzat seberare issa etotu su destinu suo. Su modellu est pigadu dae sa Assemblea Nacional Catalana, un’assòtziu chi faghet cultura, amparat sa limba e s’istòria de Catalugna e ammanìgiat addòbios pro faeddare de chistiones de importu pro cussu logu. Sa punna de ANS est de fàghere sas matessi cosas inoghe.
In custu annu s’assòtziu si nche est dadu una forma organizativa, ma at fintzas inghitzadu cun addòbios in sos tres logos in ue sunt nàschidos sos primos grupos: Tàtari, Casteddu e Durgali. In ie si sunt ammanigiadas presentadas de libros e passigiadas istòricas chi ant àpidu unu nùmeru bonu de sighidores. Cun sa lòmpida de su Covid sas atividades sunt andadas a dae in antis petzi in sas retzas sotziales in ue s’ANS at contivigiadu videos chi tratant de chistione de istòria e cultura sarda. In custos s’atentu est istadu postu a s’agiudu de sos espertos e a sa forma gràfica: Sa punna est cussa de unu produtu fatu bene chi siat berdaderu e modernu. Posca, pro more de custa atividade, est istadu abertu unu canale Youtube in ue si podent agatare onni vìdeu fatu dae ANS (link).
In tempos de Covid s’apretu fiat puru de dare cale si siat agiudu a chie nde aiat bisòngiu. ANS at abertu unu logu in facebook in ue fàghere addobiare pedida e oferta, annoende s’idea de s’agiudu torradu: chie podiat dare carchi cosa, iscreiat cussu chi podiat cumpartzire, chie aiat carchi netzessidade faghiat su matessi. Unu modu pro fraigare retza intro sa comunidade sarda in unu momentu difìtzile.
In un’annu si sunt acurtziados giòvanos medas a s’Assemblea Natzionale Sarda, un’ismanniamentu de iscritos chi faghet isperare bene, e chi càstiat a su benidore. Sa punna prus manna pro sos meses imbenientes est cussa de fraigare assembleas setoriales, est a nàrrere grupos de persones chi giughent a cumone cumpetèntzias culturales e professionales chi potzant dare suportu a sas atividades de ANS, ma finamentas agatare solutziones possìbiles a chistiones chi pertocant sa Sardigna, semper mantenende•si abertos a totus sos chi cherent traballare in paris.
Unu caminu chi est incumintzadu como como ma chi paret tzucadu bene, ammustrende chi sos giòvanos podent fàghere cultura impinnada, abarrende abertos e modernos.
Gabriele Tanda
Leave a comment