– de Salvatore Serra –
Togliatti naraiat chi unu trotzkista est un’ispia, tres trotzkistas sunt unu tzentru de provocatzione, milli trotzkistas sunt unu problema polìticu. Custa est una règula universale. E balet finas pro sa limba sarda. Ca sos polìticos si dant de ite de fàghere petzi si bident nùmeros mannos. E su movimentu linguìsticu podet isperare de otènnere cosa petzi si bi leat parte gente meda.
In Nùgoro su movimentu at proadu a ordire su filu de un’initziativa noa, pro tèssere una retza semper prus manna de interventos. Si narat “Tzitadinos pro sa Limba” su comitadu chi at a nàschere pro sighire custa finalidade. S’idea est essida a campu in un’addòviu coordinadu dae Lenardu Moro, chi at bidu comente relatores Pepe Coròngiu e Mariantonietta Piga, e in ue ant leadu parte militantes medas. Su problema prus mannu est una legge, sa 22 de su 2018, chi non funtzionat e cheret cambiada. Ma, a bandas de custu, tocat a afinare e disinnare mègius sos interventos. Unu traballu de proposta, duncas, in un’ispìritu costrutivu e de collaboratzione.
In atòngiu ant a cumintzare sos primos addòvios de sensibilizatzione. Ca sos “trotzkistas” depent èssere medas.
Leave a comment