“Su patriotu sardu a sos feudatàrios”, s’innu antifeudale iscritu dae Frantziscu Innàssiu Mannu e mègius connotu comente “Procurade ‘e moderare, barones sa tirannia”, est – l’ischimus – unu càntigu in otonàrios chi naschet in un’època in ue su male de sa Sardigna fiat rapresentadu dae su domìniu sabàudu (“Fit pro sos piemontesos sa Sardigna una cucagna”).
Oe custu càntigu, chi at surcadu sas àeras de su tempus coladu finas a su presente pro more de sas melodias de sos gosos e de sos tenores, torrat a bida cun carchi faeddu nou, ma semper in gherra: non contra a colonialistas de terras ma de carenas. Gràtzias a Bustianu Pilosu, etnomusicòlogu e espertu de traditziones orales de Sardigna, “Su patriotu sardu” est como “contra a su coronavirus”.
Su vìdeu comintzat cun ripresas aereas pigadas dae su documentàriu “A bolu” e sas partes cantadas sunt antitzipadas dae sas launeddas di Giulio Pala (de Torpé che a Pilosu).
Custas sas boghes de sos cantores a tenore e a cuncordu chi, ponende·si a disponimentu, ant dadu su contributu issoro a sa gherra contra su covid-19: Franco Davoli (Tenore Supramonte di Orgosolo), Andrea Zara (Cuncordu di Bolotana) Antonimaria Cubadda (Cuntrattu de Seneghe), Gianmarco Serra (Tenore Santa Maria di Ottana), Luciano Asole (Tenore Santa Lucia di Lodè), Angelo Soma (Tenore S’Arvorinu di Orune), Antonio Migheli (Cuncordu de su Rosariu di Santu Lussurgiu).
Su montàgiu àudiu est de Marco Lutzu; sas imàgines de Luca Melis montadas dae su regista Davide Melis. Ite b’agatamus in su testus mudadu dae Pilosu? Sa cherta de s’impinnu e de sa collaboratzione de totus sos sardos in custos tempos de isolamentu pro pòdere bìnchere sa gherra contra a s’epidemia.
«Cada cantadore – narat Pilosu -, in rispetu de sas distàntzias sotziales, at registradu sa cantada in domo sua cun su smartphone e gai etotu at fatu su sonadore de launeddas. Poscas, cantadas e sonadas sunt istadas ligadas a pare in unu file àudio. Mancari cun totu sas dificultades e sas diferentes àimas impitadas pro registrare, b’at essidu una cosa de remeju. Sa produtzione Karel at postu sas màzines, leadas dae su film “A bolu”.». Declarada est già sa gherra contra a custa pestilèntzia.
Màuru Piredda
Leave a comment