“Riu mannu. The Lan(d)guage Grabbing” de Micheli Ladu. Òpera publicada dae NOR Edizioni in su 2019, colletzione ‘Isteddos’
Fiat una isterrimenta de birde e colores; s’erba, sos frores, sas tupas, sas matas, su matedu, sa frùtora. Tzurros de abba. Mitzas incoradas. Benas bulliende. Unu giardinu istravanadu. Sa boghe mesu eletrònica de su Generale Piras chi essiat serente a un’ogru de una telecàmera l’aiat naradu a Badore de iscarrigare e assentare a manu manca de s’intrada sa linna suta de unu acucadòrgiu fatu cun pedra segada e tèulas betzas, chi aiat fatu remonire dae una domo belle derruta, e de s’acurtziare posca cara a sa domo chi fiat in fundu.
Badore aiat fatu in presse assentende sa linna gasi a dritu chi mancu chi esseret tentu su filu a prumbu de sos maistros de muru. Luego aiat bogadu sa vetura a foras e l’aiat lassada a s’acabu de una ghetadedda ue bi fiat una pratzita e su tretu pro fàghere manovra e furriare a domo sua. Cando fiat torradu, su cantzellu nche fiat giai serradu e bi fiat petzi una portita a manu dereta chi si fiat aberta a sa sola.
Leave a comment