Su 9 de santu andria est istada die de importu mannu in Catalugna pro sas minorias linguìsticas sarda e catalana. Difatis in Bartzellona, a pustis de sos saludos de Salvador Giner diretore de s’IEC, de Joan Elies Adell Pitarch rapresentate de sa Generalitat de Catalugna in S’Alighera, e de sa introduida de Joan Argenter de sa Catedra Unesco de s’Institut d’Estudes Catalans, chi cun s’agiudu de su Servìtziu Limba e Cultura Sarda de sa RAS at permìtidu a pònnere in bia sa die, Zigliana Portas at presentadu sa chirca sua a pitzu de sa normalizatzione linguìstica e su protzessu de annoamentu pedagògicu: su modellu catalanu e s’istadu de crompimentu de sa lege 482 in Itàlia, ponende capu mescas a sa chistione de S’Alighera e de s’istatus de sa minoria catalana de sa bidda de sa Provìntzia de Tàtari.
A pustis at faeddadu Jaume Vernet, ammentende sas chistiones giurìdicas chi boliat sa chirca, e cunfrontende sas italianas cun sas ispagnolas, e iscumproende sos profetos e sos anneos chi cajonant sas maneras e sos tempos de iscrìere sas leges.
Sa Diretora de s’ULS de sa Provìntzia de Nùgoro at retratadu sa situatzione de sos finantziamentos de sa 482 e de comente est assentada sa polìtica linguìstica in Sardigna a pustis de custos annos de finantziamentos, e mustrende in particulare s’atividade de sa Provìntzia de Nùgoro.
Pere Mayans in sa relata sua at contadu de comente funtzionat su sistema iscolàsticu catalanu, faghende bìdere su chi totu faghent in Catalugna, pro sa limba e comente su sistema integradu iscola limba giughet profetos mannos siat pro sa sotziedade, chi pro s’integratzione.
Una chirca sòtziu linguìstica isperimentale est sa chi at propostu Francesc Ballone; sa chirca est a pitzu de s’impreu de s’Aligheresu in sa sotziedade, iscumproende comente a cunforma de su traballu e de sa limba faeddada in domo, potzat mudare s’abilidade linguìstica.
In fines Jorgi Rusta, de sos servìtzios linguìsticos territoriales de sa Provìntzia de Nùgoro, at presentadu su traballu de sos Isportellos linguìsticos comunales, a pustis e in antis de èssere in unu progetu coordinadu, faghende· nde bìdere peleas e profetos.
S’interessu de sa comunidade linguìstica catalana est de profetu pro unu cunfrontu intre duas de sas minorias linguìsticas europeas prus mannas, pro chi su sardu leet s’isperièntzia de su catalanu pro crèschere e megiorare.
