S’assòtziu Su Majolu, costituidu dae istudiantes de s’Universidade turritana, pedit in bia ufitziale a s’Ateneu s’istitutzione de 2 cursos de làurea, unu de Formatzione Primària in Limba Sarda e unu de Limba e Literadura Sarda, giai dae s’annu acadèmicu 2012/13.L’ant annuntziadu oe, in sa sede tzentrale de s’Ateneu, 4 rapresentantes de s’assòtziu, Michele Angioi, Fabio Loddi, Luiseddu Caria e Giuseppe Piras. In sa petitzione, firmada dae 1000 istudiantes e de imbiare a su retore, a totu sos presides de facultade, a sos diretores de dipartimentu, a su presidente de sa Regione, a s’assessore a sa Cultura, a su Cussìgiu regionale e a s’Universidade de Casteddu, sos istudiantes ammentant ca s’iscola e s’Universidade tenent responsabilidades mannas pro sa pèrdida de terrinu de su sardu in sa sotziedade isulana.
Duncas iscola e universidade podent e depent rimediare a su dannu. S’istùdiu sotziulinguìsticu cummissionadu dae sa Regione a sas universidades sardas e publicadu in su 2007 narat ca su 64,8% de sos sardos faeddat su sardu o sas limbas allògenas (thatharesu, gadduresu, aligheresu e tabarchinu).
Sena contare chi sa pertzentuale de sos chi lu cumprendet est de unu 97%. Pro rispetare su deretu a tènnere un’istrutzione in sa limba istòrica de Sardigna duncas s’universidade depet fàghere a manera de formare a sos maistros, comente càpitat cun sa limba italiana e cun sas limbas istràngias, a prus de sas àteras matèrias presentes in iscola.
Sa rechesta de Su Majolu est de istituire cursos chi tratent de limba sarda faeddada e iscrita, de linguìstica e glotologia de su sardu, de istandardizatzione de su sardu, de literadura, filologia e istòria de sa limba.
In prus sos istudiantes pedint chi dae s’annu acadèmicu 2012/13 siat istituidu un’esàmene de limba sarda in sos cursos de làurea de totu sas facultades.
S’obietivu de s’initziativa est finas de dare un’isbocu ocupatzionale in prus a chie est interessadu a su sardu, chi est e depet èssere, che a totu sas limbas, una cosa bia e una funte de richesa econòmica e non culturale ebbia.