de Massimeddu Musu Cireddu
605 annos a oe, in Seddori, in su Bruncu de sa Batalla, prus de 20.000 sardos ant gherradu pro sa libertade e s’indipendèntzia de sa Sardigna. Is sardos addobiados dae cada bidda de Sardigna non ischiant ca fiant gherrende fintzas pro s’ufitzialidade de sa limba sarda.
E si is catalanos e pustis is ispagnolos si sunt limitados a impònnere sa limba issoro isceti in is atos ufitziales e in sa corte de su “Regnu de Sardigna”, is piemontesos e is italianos ant impostu s’italianu in totu sa sotziedade sarda, dae s’iscola a su traballu, dae is ufìtzios pùblicos a is mèdia, dae s’universidade a sa dibata pùblica e polìtica.
Una voluntade de omologatzione (o genotzìdiu?) culturale de is sardos e de is àteras comunidades natzionales in intro de is làcanas de s’istadu italianu chi est istadu portadu a in antis in manera iscientìfica dae is res savojardos, est andadu a in antis cun su fascismu e est sighende fintzas a oe, cun cussu chi Pasolini numenaiat che a “Fascismu nou”.
Non depet ispantare custa voluntade aici manna e costante in su tempus de nde cantzellare is limbas de sa natziones nostra. Comente naraiat Gramsci, sa chistione linguìstica est una chistione polìtica e de egemonia culturale. E tocat fintzas a regordare cussu chi naraiat Orwell, chi pro prevènnere sa possibilidade de una emantzipatzione e de unu cambiamentu pro primu cosa tocat a nde bogare is faeddos e is limbas chi permitint a cussa emantzipatzione de èssere pensada.
E si portamus su discursu a die de oe, su guvernu de sa dipendèntzia e chi dae sa dipendèntzia dae s’Itàlia pigat su reconnoschimentu suo (Renzi chi in campagna eletorale benit a donare sa beneditzione a Pigliaru e a ddi regordare ca su mere non est issu), non podet che sighire in custa àndala de minorizatzione de su sardu.
Canto sunt is assessores de Pigliaru e is cussigeris regionales, chi non ischint nemmancu ca oe sunt 605 annos chi sa Sardigna at pèrdidu sa libertade e ca su sardu at cumintzadu a èssere minorizadu? Pigliaru e medas de is persones chi tenet a giru, fintzas intre is neo-autonomistas o soberanistas, non ischint o si birgòngiant a chistionare su sardu! E Pigliaru at a ascurtare is amigos suos universitàrios chi sunt chirchende de fuliare a s’àliga sa polìtica linguìstica sarda e annos de traballu de unu muntone de gente chi chircat onni die de nde bogare su sardu dae sa minorizatzione?
Oe regordamus cussa Batalla, cussos sardos lìberos chi ant gherradu pro s’indipendèntzia e sa libertade, e sighimus sa batalla nostra pro sa libertade e s’indipendèntzia culturale e polìtica de sa Sardigna, pro su plurilinguismu e is limbas natzionales nostras, contra a cale si siat dipendèntzia e contra a su monolinguismu in italianu de sa classe dominante chi oe guvernat sa Sardigna.
Leave a comment