-de Sarvadore Serra –
Maria Carta, cantante sarda galu in su coro de sos sardos, mancaiat in Roma, in ue biviat dae tempus meda, su 22 de cabudanni de su 1994. Nàschida in Sìligo su 24 de làmpadas de su 1934 cheret amentada ca est istada sa cantante prus famada de sa mùsica traditzionale sarda; ma est istada fintzas atora de gabbale.
S’atividade artìstica sua at interessadu su càntigu a chiterra, sos gosos, sas anninnias, su càntigu gregorianu. Est istada bona a agiornare sa traditzione cun arrangiamentos modernos e personales In su 1975 at iscritu unu libru de poesias in rima adatas a sa mùsica sarda: Canto Rituale.
Ma b’at fintzas aspetos prus “lèbios” de sa vida de Maria Carta: in su 1957 at bintu su cuncursu de bellesa Miss Sardegna e pustis at leadu parte a Miss Italia. At fintzas traballadu in su fotoromanzu Questo sangue sardo, iscritu e realizadu dae Abramo Garau in Sàrdara.
In su 1960 si nch’est tramudada a Roma, in ue at connotu s’iscenegiadore Salvatore Laurani, chi pustis si sunt cojuados. At frecuentadu su Tzentru de istùdios de mùsica populare ghiadu dae Diego Carpitella in s’ “Accademia Nazionale di Santa Cecilia” ; in su matessi tempus at cumintzadu unu traballu de istùdiu musicale e etnogràficu cun produtziones e collaboratziones de importu.
In su 1971 at fatu duos album: Sardegna canta e Paradiso in re. In s’ìnteri at frecuentadu s’etnomusicòlogu Gavinu Gabriel. In su matessi annu sa Rai at trasmissu su documentàriu Incontro con Maria Carta (fotografia de Franco Pinna e testos de Velia Magno), in ue Maria at cantadu e at fintzas retzitadu cun Riccardo Cucciolla. B’at àpidu fintzas un’àteru documentàriu (cun sa regia de Gianni Amico e s’iscenegiadura de Salvatore Laurani) cun su tìtulu Maria Carta. Sardegna, una voce.
In su 1972 at retzitadu in su Teatru Argentina in Roma in sa Medea di Franco Enriquez. In su matessi annua at connotu a Amália Rodrigues, e at fatu cun issa unu cuntzertu in su Teatru Sistina. In su 1973 sas duas artistas ant fatu una tournée in Sardigna. In su 1974 at leadu parte a Canzonissima, cantende su Deus ti salvet Maria. Est arribbada in finale e s’est classificada segunda in su girone de sa mùsica traditzionale cun sa cantzone Amore disisperadu.
IIn su 1975 at fatu unu cuntzertu importante in su Teatru Bol’šoj de Mosca.
Non s’est negada mancu de fàghere polìtica: in su 1976 l’ant elèghida, pro su Partito Comunista Italiano, in su cussìgiu comunale de Roma; b’est abbarrada fintzas a su 1981.In su 1980 at leadu parte a su Festival de Avignone. In su 1987 s’est esibida in sa catedrale de San Patrick in New York e in su 1988 in sa catedrale de St. Mary in San Francisco.
Comente atora, at mustradu semper sensisibilidade e una presèntzia iscènica manna, incantende registas comente Francis Ford Coppola e Franco Zeffirelli, chi l’ant cramada a traballare cun issos.Est istada ligada meda a s’Universidade de Bologna, in ue at tentu una sèrie de letziones e at sighidu unos cantos istudentes chi fiant ammaniende tesis de làurea subra de sa mùsica.
Sos ùrtimos annos sunt istados sinnados dae sas suferèntzias pro una maladia mala. Issa non s’est arrèndida e at fatu una sèrie de cuntzertos. Unu de sos prus importantes b’est istadu in sa fiera de Casteddu su 26 de austu de su 1993. In sa manifestatzione “In concerto con Maria”, b’ant leadu parte sas mègius espressiones de sa mùsica sarda (Tazenda, Cordas et Cannas, Calic, Bertas, tenores de Vitzi e Neoneli, Luigi Lai cun sas launeddas, su Duo Puggioni). Maria Carta at propostu totu su repertòriu suo, dae sos càntigos gregorianos a sas anninnias, dae “Chelu e mare” acumpangiada dae Luigi Lai, a “Sa dansa” cun sos Tazenda, fintzas a una versione cummovente “a cappella” de “No potho reposare” cun Andrea Parodi. Pagu prus de un’annu a pustis, su 22 de cabudanni de su 1994, si nch’est morta in sa domo sua in Roma.
Ligàmenes: https://it.wikipedia.org/wiki/Maria_Carta
http://www.fondazionemariacarta.it/mariacarta/percorso_culturale/default3.htm
https://www.youtube.com/watch?v=AmeKtNSZkTI
Leave a comment