Sos sientziados de sa NASA ant assebertadu in s’ispàtziu una codina manna manna chi si diat pòdere fragassare in sa Terra in su 2032. E, mancari non paret chi custa roca siat a tretu de burrare s’umanidade, diat pòdere destruire una tzitade.
S’asteròide, chi li narant 2024 YR4, l’at iscobertu su sistema de allarne de sa NASA su 27 de nadale de su 2024. A su chi narant sos istudiosos, tenet una subra de 83 possibilidades de impatare cun su pianeta nostru in su 2032.
2024 YR4 tenet sa tzircuferèntzia de 180 pees (55 metros). Sos sientziados narant chi diat pòdere liberare unos 8 megatones de energia si nche lompet a terra, prus de 500 bias de sos de sa bomba atòmica chi at destruidu Hiroshima.
Mancari s’asteròide in custu mamentu si siat allarghende dae nois, sa Terra si l’at a acurtziare prus de una bia in su giru de 50 annos. Su primu acurtziòngiu at a èssere in s’agabbu de su 2028, e pustis bi nd’at a àere àteros ses intre su 2032 e su 2074. De custos, su chi b’at a àere prus probabilidades de impatu cun sa Terra at a èssere, a su chi narat sa NASA, su 22 de nadale de su 2032.
Est ca b’at minetzas de custa casta chi sa NASA e àteras agentzias ispatziales sunt interessadas a isvilupare tècnicas pro fàghere cambiare caminu a custos cantzos mannos de roca, comente in sa chi li narant Missione de proa de reindiritzamentu de sos asteròides . Sas probabilidades de un’impatu catastròficu sunt a su sòlitu bassas meda, ma tocat a monitorare custas codinas de s’ispàtziu, ca non s’ischit mai.
