– de Salvatore Serra –
Polìtica linguìstica cheret nàrrere finas a fàghere giornales cun artìculos in sardu, pro afortire sa capatzidade de custa limba de operare cun unu registru artu.
Oe bos presento su nùmeru de nadale de su 1978 de “Su populu sardu”, òrganu de su movimentu omònimu chi essiat in sos annos 70 de su 900.
Su giornale lu bendiant no in Sardigna ebbia, ma finas in Roma, Firenze, Como, Milanu, Torinu, Siena, Mòdena, Pisa. A dolu mannu sos giornalistas, forsis pro un’ idea antigòria de traballu colletivu, non firmaiant sos artìculos issoro, e duncas, nessi pro como, no ischimus chie sunt sos autores.
Inoghe apo trascritu unas cantas rias de s’artìculu de prima pàgina, chi faeddat de sa crisi de s’autonomia de cussos annos, in ue fiant presos a pare elementos econòmicos (cun su disamparu de su sistema industriale, in ue belle totu sas fàbricas fiant a puntu de serrare, pro non faeddare de sa crisi de s’agricultura e de su funtzionamentu malu de sos trasportos) e elementos sceti polìticos (pro nàrrere, cun s’interferèntzia de sa DC romana chi no aiat chertu s’intrada de su Partidu Comunista in sa giunta autonomìstica)
________
Sa SIR Rumianca tancat sos istabilimentos, sun minetande de tancare s’industria de Otana intro de su 10 de nadale, in sa SIR de Portuturre in ue si traballat in cundiziones medas malas pro sa salude nde sun lissentziande pacos cada die, sa Metallurgica de su Tirsu, sa Solis, sa Marfili , e gai… sun tancande o sun pro tancare.
In sas minas sa situatzione est gai etotu. S’agricurtura est posta meda male e semus custrintos a importare a bator bortas de su chi esportamus. Sos trasportos de custu istadu ponen a un’ala sa Sardigna e la custringhen a s’isulamentu fortzadu.
Custa est sa Sardigna apustis de un’annu dae sas festas po sos trintannos de autonomia << speciale >> . Custa est sa Sardigna apustis de << il rigore e l’austerità >> chi aiat depidu rennovare custu istadu …
Leave a comment