Redatzione
Una lege pro sas iscolas chi amparet finas sa limba sarda. L’at naradu eris s’assessore regionale Clàudia Firino in s’ìnteri de sa cunferèntzia imprenta de presentatzione de Sa Die 2014. <S’intentu est cussu de aprovare una norma pro tutelare s’iscola sarda e intervènnere subra s’insinnamentu de su sardu sende chi in custu setore amus una potestade legislativa chi no est isfrutada>.
S’assessore at naradu chi in su campu de sa polìtica linguìstica, in custos ùrtimos annos, si sunt fatas initziativas importantes e chi como est s’ora de medire, cumpudare e valutare su chi s’est fatu pro cumprèndere sos resurtos. Sa punna diat èssere cussa de ampliare e potentziare. .
S’assessore regionale espressione de Sel at annantu chi ‘su fatu chi b’apat una sessada de sos finantziamentos in sas iscolas non bolet nàrrere chi si frimment finas s’ideatzione e sa progetatzione’.
Abarrat de bìdere comente s’assessore e sa Giunta pensant de barigare sos lìmites legislativos chi sa Corte Costitutzionale at impostu a sas Regiones cun paritzas pronùntzias. Difatis, in intro de sa cumpetèntzia cuncurrente pro s’istrutzione no est reconnota cussa de sas minorias linguistìcas chi abbarrat in capu a s’istadu. Custa matèria est regulada dae sa lege 482 e sas Regiones non podent legiferare si non in intro de sos paletos de s’artìculu 4.
Si non càmbiat custu cuadru giurìdicu non paret chi sa Regione potzat fàghere initziativas legislativas in sas iscolas meda a tesu dae su sardu curricolare a progetu chi si faghet como. E chi, ascurtende sas paràulas de s’assessore, paret chi non siat prus finantziadu dae sa Giunta Pigliaru.