Sa Festa de Sa Limba Ufitziale, su 21 de cabudanni in Sèdilo

IMG_5125

Domìniga 21 de Cabudanni, in ocasione de sa Die Europea de sas Limbas, su Coordinamentu pro su Sardu Ufitziale cuncordat, cun su patronadu de sa comuna de Sèdilo sa Festa de sa Limba Ufitziale.

Punna de sa manifestatzione est cussa de promòvere e defensare su protzessu de istandardizatzione e afortigamentu de su sardu in tempos in sos cales prus de una fortza diat chèrrere iscontzare su traballu.

Sa chistione de sa limba in Sardigna pilisat problemas a sas èlites dominantes chi non ponent mai unu puntu firmu. In custos ùrtimos deghe annos, finas cun sa pressione de su Movimentu Linguìsticu, si sunt fatas cosas medas, ma paritzas abarrant de fàghere.

S’ufitzializatzione cumpleta de sa limba pro mèdiu de s’ùnicu standard chi tenimus, sa LSC, est una de custas. In tames a subra de custu sèberu, chi est a fundamentu de cale si siat polìtica linguìstica, non si resesset a lòmpere a una craresa informativa e operativa.

Nde resurtat, a dies de oe, una debilesa de intentu, s’indiferèntzia si non s’ostilidade, de su guvernu regionale presente in su cumbinchimentu chi sa limba ufitziale siat unu problema e non una resursa. E finas s’idea de impreare a dispetu sa ‘cuntierra’ pesada dae sos contra pro non fàghere nudda. Difatis, sa positzione polìtica chi istàgiat sas àteras, pro una polìtica sèria e operativa, est cussa si unu est o no in favore a una limba ufitziale standardizada.

Tando est netzessariu unu momentu de addòbiu e de festa, sèria ma finas lèbia, pro acrarire, informare, denuntziare, cumbìnchere e apasigare subra su tema de sa limba ufitziale e de sos fatos, finas neulosos, chi l’indùrriant. Una Die, aberta a totus, in ue si podet cumprèndere finas in alligra ite est sa limba ufitziale, ite tretu at fatu e ite galu depet fàghere.

Sa LSC no est prus unu simple còdighe amministrativu in essida dae sa Regione. In custos annos est andada a in antis e est impreada a paritzos livellos dae paritzos entes e sugetos privados. Est intrada in s’editoria, in sa televisione, in sa literadura, in sas artes, in sas iscolas e finas in s’universidade. A chie giuat frimmare custa pesada?

Sa Giunta, Su Cussìgiu regionale , sos sìndigos, sos àteros entes e s’opinione pùblica non podent fàghere finta de nudda pro custa chistione imbeniente. Totus sunt cumbidados.

Sa Die de Festa at a tènnere paritzos momentos e diferentes galu de afinare. Comintzat cun s’isterrida de su sìndigu de Sèdilo Umberto Cocco. Posca:

Relatas (curtzas) pro acrarire ite est a ite serbit e ite tretu at fatu sa limba ufitziale.

Mesa de arresonu cun polìticos e giornalistas. Interventos e dibàtitu lìberu.
Pràngiu sotziale a prejos polìticos.
Mùsica, ballos, cantzones, artes. Poesia tzivile.
Espositzione de sos editores. Giogos pro pipios in sardu.

Nos bidimus a sas 9.30 de domìniga 21 de cabudanni in Sèdilo in su salone de ‘Sa prima ‘Ighina’ in pratza de Santu Giuanne.

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com