Novas bonas: su TG in sardu de Videolina

de Massimeddu Musu Cireddu

In una temporada chi tenet pagas novidades bonas pro sa chistione linguìstica sarda e pro su problema de s’informatzione, in cust’istade chi at a èssere regordade pro su disinteressu de sa polìtica dipentista e forsis pro is “brigas” ispassiosas chi si faghent cumpangia a suta de s’umbrellone, b’est fintzas carchi cosa de nou e de bonu chi podet donare un’ispera a totus cussos chi istimant su sardu.

Dae unas cantu dies, difatis, gràtzias a unu finantziamentu donadu carchi mese a oe dae su servìtziu de sa limba sarda de sa RAS, est andende in unda cada die un’editzione in sardu de su telegiornale de Videolina. O mègius tres, una a ora de pràndere (a is duas e mesu), una a su sero (a is otu mancu chimbe) e in ùrtimu una a mesunote. Pro immoe su TG in sardu andat in unda in una versione “in curtzu” de 5 minutos, cun is novas prus importantes, ma s’isperu est cussu de bìdere un’editzione cumpleta in is meses chi ant a bènnere.

A palas de custa novidade b’est su traballu de Tore Cubeddu, autore e presentadore televisivu, giai connotu pro medas trasmissiones in sardu in TCS e in Videolina. A lèghere is novas ant a èssere, una die s’unu e una die s’àteru, Micheli Ladu e Ivo Murgia. Unu sèberu interessante meda, giai ca is duos speakers chistionant duas faeddadas diferentes; Micheli est de Ollollai mentres Ivo est pirresu.

Interessante meda fintzas su sèberu de pònnere is iscritas e is gràficas de su TG sighende s’istandard de iscritura. Una manera in prus pro dimustrare ca su sardu est una limba unitària e ca si podimus cumprèndere a pare siat in su faeddadu e siat in s’iscritu, bastat a tènnere gana de s’ascurtare.

Duncas cumplimentos mannos a is autores e presentadores de custa bella novidade editoriale, e cumplimentos fintzas a su diretore de su telegiornale Emanuele Dessì e a totu sa redatzione de su TG de Videolina pro sa capatzidade e sa sensibilidade issoro a èssere ascurtadu custa esigèntzia de informatzione in sardu chi benit dae sa sotziedade sarda.

Isperamus chi siant semper de prus is privados chi tèngiant sa voluntade de portare a in antis progetos in sardu, e isparamus ca is entes pùblicos sigant a finantziare custos e àteros progetos pro ispainare e afortiare su sardu. Si bolides fàghere is cumplimentos a sa redatzione e preguntare un’editzione longa de su TG in sardu, podides imbiare un’email a redazione@videolina.it

4 Cummentos

  1. Gràtzias! Nde semus cuntentos meda. Est una manera de importu pro fàghere intrare su sardu in televisione cun format noos e modernos. Como un’àndala est aberta. Tocat a nois a dda megiorare e fàghere a cumprèndere ca si podet.

  2. Est unu prexu mannu a poder iscurtare sas novas in sardu, e po de prus cun speakers che a Ivo e Micheli. Mancai podit essi puru sa borta bona chi acabint sas peleas intra de sardos chi galu s’iscorriant po fai de manera chi siat sa variante issoro sa de imperai cumenti e limba ufitziali. Tropu togus Tore, Ivo e Micheli e tropu toga Videolina puru!!!

  3. Pasquale Tedde says:

    Ipero chi siede su cominzu de una cosa pius manna. De fagher in manera chi siede unu telegiornale,non pius curtzu ma longu. Unu saludu.

  4. Eu leio e entendo,ouço e entendo tudo em sardo ,porém não sou capaz de escrever.Há tempo que eu procuro um telejornal nessa língua mas tem sido muito difícil encontrar.
    Espero que este portal va satisfazer o meu desejo. Obrigado.

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com