Isport sardu in sardu? Eja, gràtzias a “Foras de giogu” e Diàriu Isportivu

de Massimeddu Musu Cireddu

diariu isportivu

Una rubrica chi contat s’isport e sa cultura isportiva sarda in sardu. Ma fintzas una manera noa pro contare sa sotzialidade e sa cultura de is biddas e tzitades nostras. Est custu su progetu chi Diàriu Isportivu, su situ prus importante de isport diletantìsticu sardu, est portende a in antis cun sa rubrica “Foras de giogu”.

E non podiat tènnere nùmene prus giustu custa pàgina virtuale, giai ca si contat in manera originale e a bortas ispantosa no isceti is resurtados e is partidas, ma fintzas totu su mundu chi si movet a giru de su fùbalu. Dae is iscolas de fùbalu pro pipios e pitzocos a is partidas detzisivas pro totu s’istajone pro duas iscuadras e duas biddas, dae is seletziones giovaniles sardas a is campionados pro amadores e over 43 annos fintzas a sa tecnologia cun is app pro iPad e iPhone pro pòdere lèghere is resurtados de is partidas in tempus reale.

In prus de is artìculos iscritos sighende s’istandard, fintzas unos cantu vìdeos e intervistas in sardu, in ue su giornalista Antonello Lai preguntat faeddende in casteddaju e is intervistados respundent in sa faeddada cosa issoro (tonaresu, sorgonesu, gavoesu, etc.) sena perunu problema a si cumprèndere a pare.

Su progetu Foras de giogu, finantziadu dae su servìtziu limba sarda de sa RAS, est duncas donende a totus is realidades isportivas sardas una possibilidade in prus pro contare unu mundu chi in is biddas nostras est importante fintzas pro chistiones sotziales e culturales. Un’esempru de a beru positivu de polìtica linguìstica chi isperamus potzat andare a in antis gràtzias a sa voluntade de s’editore e a s’agiudu de is istitutziones pùblicas.

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com