Sas eletziones de su 29 de maju coladu ant determinadu unu terremotu polìticu in Sudàfrica. Pro sa prima borta dae sa fine de s’apartheid s’ANC (African National Congress) no at otènnidu sa majoria assoluta de sos votos.
Sa formatzione istòrica de sa luta a sa segregatzione ratziale at leadu su 40,18% de sas preferèntzias. Su segundu partidu est resurtadu sa DA (Democratic Alliance) cun su 21,81% de sos votos.
A coa su MK, cun su 14,58%, e in fines, in antis de sas formatziones minores, su EFF, cun su 9,52%.
Sa Democratic Alliance est su partidu, tzentrista, espressione pro su prus de s’eletoradu biancu, siat afrikaner siat britànnicu, de sos colored e de sos oriundos indianos.
Su MK, uMkhonto Wesizwe, leat su nùmene dae s’antiga formatzione paramilitare de s’ANC in sos tempos de s’apartheid. S’eletoradu de riferimentu est s’etnia Zulu e tenet positziones polìticas de manca sotzialista.
Su EFF (Economic Freedom Fighters) si ponet a manca de su MK, cun positziones marxistas-leninistas e a su matessi tempus panafricanistas. A prus de custu su movimentu, ghiadu dae Julius Malema, tenet una polìtica anti-bianca e crìtica cun sa minoria de orìgine indiana.
A custu puntu s’ANC de su presidente Cyril Ramaphosa pro pòdere formare unu guvernu depet formare una coalitzione. Su candidadu prus probàbile est sa DA de John Steenhuisen, chi si podet cunsìderare s’ùnicu partidu de a beru multiratziale de Sudàfrica.
S’istadu africanu bivet una situatzione de instabilidade econòmica, corrutzione polìtica e violèntzia. S’idea de una natzione multiètnica no at mai cagiadu, cun su natzionalismu Zulu semper forte e unu movimentu indipendentista chi s’est isvilupadu sos ùrtimos annos in su Cabu otzidentale, in ue sa majoria relativa est colored, motivadu dae resones polìticas e non ratziales.
(gianni muroni)
Leave a comment