Enceladus: vida b’at in custa luna de Saturnu?

de Sarvadore Serra

Est dae meda chi sos astrònomos sunt istudiende una de sas lunas de Saturnu, Enceladus, unu corpus pedrosu cugugiadu dae unu pìgiu de astra de prus  de trinta chilòmetros  de profundidade e chi tenet  unos  500 chilòmetros de diàmetru. Como sa  NASA at annuntziadu chi forsis b’at vida micròbica in s’otzèanu suterràneu de custu satèllite.

Sa sonda Cassini, chi dae prus de una dècada òrbitat a fùrriu de Saturnu, inghiriende in  su sistema suo ispetaculare de aneddos e in mesu de sas lunas suas misteriosas, in santugaine de su  2015 at fatu una manovra esplorativa, colende meda a curtzu  a su polu  sud de Encèladus pro esaminare sas nues de gas chi s’isvilupant dae sos  geiser de custu satèllite. S’idea fiat a leare  partìculas de abba  e àteros elementos pro los analizare e cumprèndere si est a beru possìbile chi in cue bi siat sa  vida.

Sos resurtados de s’istùdiu publicados in sa revista Science narant chi bi podet àere formas de vida simple simigiantes a sas chi b’at  in sas partes prus fundudas de sos otzèanos terrestres. Sa  Cassini at abberguadu  chi in sas nues chi essint dae sos geiser presentes in su satèllite  b’at  molèculas de idrògenu e de diòssidu de carbòniu. Custos cumpostos probabilmente  si sunt originados pro more de un’atividade idrotermale. In sa  Terra custu fenòmenu si verìficat  cando su magma, chi tenet una temperadura arta a beru, intrat in cuntatu  cun s’abba: cando b’at custa atividade idrotermale, sunt presentes comunidades micròbicas chi si podent alimentare  cun sos cumpostos chi amus naradu. B’at de agiùnghere chi, dae àteros campiones prelevados dae Cassini, resurtat chi, in prus de custos cumpostos, b’at fintzas metanu e abba.

Semus bastante seguros chi s’otzèanu internu de  Enceladus est abitàbile e amus bisòngiu de bi sighire a traballare, at naradu Hunter Waite, astrònomu de sa  missione Cassini. Custu otzèanu suterràneu est a chilòmetros medas de profundidade, e si mantenet in istadu lìchidu suta de unu pìgiu de astra pro more de sa cumpressione gravitatzionale  de Saturnu.

Ligàmenes:

http://www.vilaweb.cat/noticies/quina-forma-de-vida-hi-pot-haver-a-encelad-la-lluna-gelada-de-saturn/

http://www.vilaweb.cat/noticies/quina-forma-de-vida-hi-pot-haver-a-encelad-la-lluna-gelada-de-saturn/

 

 

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com