– de Sarvadore Serra
B’at un’interessu nou pro s’esèrtzitu chi at dominadu s’Europa nessi pro 110 annos, e chi sas impresas suas (e derrotas) sunt argumentu de cunferèntzias, pesant passiones in sas retzas sotziales, ispirant tìtulos noos e fintzas s’abertura de librerias ispetzializadas: totu pro faeddare de un’unidade militare creada in su 1536 e chi sa presèntzia sua est istada sinònimu de vitòria fintzas a su 1643.
Rafael Rodrigo, dutore in Istòria e coordinadore de su “Foro de Historia Militar Gran Capitán”, narat chi sos chi sighint s’assòtziu suo sunt colados in pagos annos dae 3.000 a 30.000. “A sas cunferèntzias acudit unu muntone de gente. Tue amànias reuniones sena fàghere publitzidade meda e si presentant 300 pessones dae totu Ispagna”. Rodrigo pensat chi totu custu b’intrat cun sas “recreatziones pintòricas de Augusto Ferrer-Dalmau, sos romanzos de Arturo Pérez-Reverte [Alatriste] e sèries televisivas comente El Ministerio del Tiempo”. “B’at chie ligat custu fenòmenu cun sa polìtica. Deo creo chi custu ligàmene non b’est. S’argumentu interessat a gente de cada casta e ideologia. Però podet dare chi s’esistèntzia de movimentos indipendentistas apat fatu crèschere s’interessamentu”, agiunghet.
Sos “tercios” fiant s’esèrtzitu chi sa Casa de Àustria ispagnola impitaiat pro dominare su mundu, un’arma de gherra chi fiat impossìbile a la bìnchere e chi in s’arte militare fiat diferente dae totu sas àteras. Tenent sa raighina issoro intre s’agabbu de su sèculu XV e su cumintzu de su sèculu XVI. B’at espertos chi los ponent in relatzione cun sas tropas de sos Res Catòlicos e sas coronelias de Gonzalo Fernández de Córdoba. Essint a campu pro sa prima bia in unu testu iscritu in sas Ordinàntzias de Gènova de su 1536.
Sos tercios ispagnolos petzi podiant èssere cumandados dae sordados chi faeddaiant in castiglianu, catalanu, portughesu o sardu. Totu sos àteros non podiant otènnere avantzamentos. Sos italianos chi imprapastulaint unu pagu de ispagnolu finghiant de èssere valentzianos pro chircare de otènere sa promotzione. 
In su cumintzu bi nd’aiat bator: Nàpule, Sitzìlia, Lombardia e Nitza (chi li naraiant fintzas Màlaga). Non teniant denominatziones militares ufitziales e leaiant su nùmene dae su logu de nàschida de su maistru de campu chi los cumandaiat. Sa pressione bèllica chi sufriat s’Ispagna at fatu a manera chi su nùmeru siat aumentadu e chi si siant diferentziados sos prus antigos (tercios betzos) dae cussos creados prus de reghente (tercios noos).
Cada tercio fiat formadu dae 10 unidades o cumpangias in ue b’aiat tres castas de sordados: picheris, archibuseris e rodeleris. Cada maistru de campu, su responsàbile màssimu de su tercio, cumandaiat unos deghe capitanos, dae sos cales dipendiant sergentes, alfieris, sergentes majores, capellanos (gesuitas), barberis… Sos sordados, si non teniant cunfiàntzia in su capitanu, podiant cambiare cumpangia sena problema perunu. Sos afares internos non si resolviant mai a corpos, ma b’aiat petzi una solutzione in casu de insubordinatzione: s’ispada.
Su Tercio betzu de Sardigna, creadu in su 1564, pro voluntade de Felipe II de Ispagna, dae Gonzalo de Bracamonte y d’Avila comente repartu voluntàriu professionale, fiat formadu dae veteranos de grandu esperièntzia, presentes in sas tzitades prus mannas de Sardigna (mescamente in sos presìdios de Casteddu, Casteddu Aragonesu e S’Alighera).
Teniat sas sedes in Casteddu e in Tèmpiu e fiat formadu dae deghe cumpangias de fanteria mista de picheris e archibuseris, pro unu totale de 1.728 sordados in su 1567.
In custa prima fase in su Tercio de Cerdeña, comente in totu sos tercios ispagnolos, reclutaiant pro su prus sordados castiglianos (mescamente de su sud-ovest de Castìglia, de Granada e de Estremadura), integrados cun carchi aragonesu e cun pagos mertzenàrios internatzionales (a s’ispissu navarresos, duncas ibèricos). Comente preferèntzia, sos sordados sardos nche los poniant in Tercios diferentes dae su de Cerdeña, pro istransire chi b’aeret ligàmenes de parentiu intre sos sordados e sos tzitadinos.
Pustis, in su 1626, in s’àmbitu de sa polìtica de sa “union de las armas” de su Primu Ministru ispagnolu Duca de Olivares, cun s’arrolamentu de 1.200 òmines reclutados in Sardigna, est cumintzada, a dimanda de su Cussìgiu de sa Corona de Aragona, sa formatzione de Tercios a beru sardos. A su personale de custas unidades, ca l’aiat pedidu su Bratzu Militare de sos Istamentos de su Rennu de Sardigna, lis ant cuntzèdidu su status, cun su tratamentu currispondente, de “soldados españoles”
Su primu Tercio sardu formadu gasi, chi li naraiant Tercio de Cerdeña II, l’ant postu suta de su cumandu de su Maistru de Campu don Jeronimo de Cervellon y Torresani, conte de Sèdilo, e l’ant imbiadu a Lombardia, in su 1628, pro sa gherra de su Monferrato, in ue at leadu parte in s’assèdiu de Casale. Pustis, l’ant impitadu in Fiandras in su 1631, in s’àmbitu de sa Gherra manna de sos 30 annos in ue, a pustis chi si nch’est mortu don Jeronimo, est coladu suta de su cumandu de su frade don Matias; in fines nche l’ant iscontzadu in su 1632.
Un’àteru Tercio sardu, chi li naraint Tercio de Castelvì ca l’aiat chertu sa famìlia nòbile de Castelvì, fiat in Cartagena, in su 1638, in ue at reprìmidu un’ammutinamentu. In su 1642, suta de su cumandu de su Maistru de Campu don Jorge de Castelvì, nche l’ant mandadu a Fiandras e a su nord de sa Frantza, in ue at bìnchidu in sa Batalla de Honnecourt. In su 1643 l’ant derrotadu in sa Batalla de Rocroi, in ue figurat comente unu de sos Tercios chi ant refudadu sas cunditziones onoràbiles de resa propostas dae sos frantzesos e ant gherradu finas a s’annientamentu cumpletu. Custu Tercio, mancari esseret torradu a pagu prus de dughentos òmines, nche l’ant iscontzadu (reformado) petzi in su 1647, pro respetu de su cumandante suo, don Jorge de Castelvì, chi petzi in cussu annu est recuidu dae unu perìodu longu de presonia in Frantza.
Ma b’at àteros repartos formados in Sardigna in su sèculu XVII, inditados cunforma a su nùmene de sos cumandantes: in mesu de sos àteros bi fiant su Tercio de Passino, su Tercio de Aragall, ambos duos impitados in sas Fiandras, e su Tercio de Alagon, impitadu in s’assèdiu de Messina ocupada dae sos frantzesos.
In fines, s’ischit de sa formatzione de unu “Regimiento de Cerdeña”, in su perìudu 1717 – 1720, in su cale, cando est agabbada sa gherra de sutzessione ispagnola, su pretendente de sa Casa de Borbone, chi oramai fiat re de Ispagna cun su nùmene de Felipe V, impugnende sas determinatziones leadas cun su Tratadu de Utrecht de su 1713, at detzisu de torrare a ocupare sa Sardigna, chi custu tratadu l’aiat assinnada a su pretendente Karl von Habsburg. S’esigèntzia de formare unu Regimiento de Cerdeña l’aiant prospetada, in particulare, in sa “Nueva Planta de Cerdeña” cunsighente a sa reocupatzione de s’ìsula e a su passàgiu suo dae su Cussìgiu de sa Corona de Aragona (chi nche l’aiant iscontzadu) a su Cussìgiu de Italia. Custu regimentu l’ant formadu in Pamplona su 10 de freàrgiu de su 1718 e l’ant postu suta de su cumandu de su Coronel don Josè de Lima Masones, membru cadetu de sa famìlia de sos contes de Montalvo e barones de Pasada. Faghiat parte de s’ordinamentu de s’Esèrtzitu Ispagnolu galu in su 1737, in sa lista de sos “Regimientos de Infanteria Italiana”, ma non prus in s’Ordinàntzia Reale de su 16 de abrile de su 1741, chi tratat de “la antiguidad de los Regimientos”.
Ligàmenes:
https://it.wikipedia.org/wiki/Tercio_de_Cerde%C3%B1a
Leave a comment
Bona sero,
hazis una imagine o unu disegnu ‘e sa bandera de don Jeronimo Cervellón y Torresani,maistru ‘e campu de su Tercio II de Cerdeña o puru una bandera de su maistru ‘e campu don Jorge Belví che fuit in Fiandras in su 1642?
Saludos.
Michele Scala.
Bonas dies,
sa bandela che s’idedet in cussu articulu
de chi est?De su tercio de Jerónimo de Cervellón o ‘e Jorge de Castelví?
Bonas dies,
sa bandela che s’idedet in cussu articulu est cudda ‘e su tercio de Sardinia?Si est issa,est sa de Jerónino de Cervellón o sa de Jorge de Castellví?