Sa COVISOC at naradu chi emmo: Torres in Lega Pro.

torres

Sa noa bona benit dae Firenze, a pustis de àere compudadu totu, sa COVISOC (s’ente chi iscumproat sa regularidade contàbile in su fùbalu) at reconnotu bàlidu chi sa Torres siat assentada a su campionadu de segunda divisione.

Custu cheret nàrrere chi su caminu chi ant pigadu sos dirigentes noos de sa Torres est giustu, su chi como mancat est de bìdere comente sunt tremesadas siat sa sotziedade, siat s’iscuadra.

Sa prima cosa est s’allenadore. Custas dies ant faeddade de nùmenes meda: Cuccureddu, Firicano, Foschi, Luiso. S’ùrtima boghe est sa de Sanderra, chi nche at giutu su Latina a Sèrie B, e si comente isse puru est de Latina, che a su presidente Capitani, bi cheret pagu a si bìdere bisos bonos. Su chi s’ischit est chi intro de 48 oras s’at a ischire chie est s’allenadore nou de sa Torres.

Tempus bi nd’at pagu, su bonu de sas iscuadras ant a cumentzare a traballare dae lunis, e sa Torres non podet isetare prus de su 20 de custu mese, si cheret fàghere unu traballu comente si tocat.