Ghermanos: sa mustra de Diegu Asproni

Fògiu publitzitàriu
Fògiu publitzitàriu

Su 13 de trìulas a sas 20.00 in sa “Domo de sas damas” de Pasada, in su tzentru istòricu, b’at a èssere sa tzerimònia de inauguratzione de sa sa mustra GHERMANOS de Diegu Asproni. A pustis s’at projetare “Sa terra e su chelu” unu filmadu chi contat su traballu de s’artista Diegu Asproni, dae sa gollida de sos colores naturales a comente sunt impreados in sos muros cun sa tècnica de sa pintura a friscu.

In sa mustra b’ant a èssere ùndighi isculturas imprestadas dae su Museu de sa Mina de sos Enattos de Lùvula: s’idea de custa collaboratzione intre de s’amministratzione  comunale de Pasada e sa sotziedade minerària Igea est istada de Asproni. Sas punnas de su progetu sunt mescamente duas: donare a sa bidda de Pasada un’eventu culturale de importu mannu e donare visibilidade in sa costa a su situ mineràriu de Sos Enattos. Una manera diferente de mustrare sa Sardigna, chi no at mare ebbia, ma montes, cultura e istòria.

S’at a pòdere bisitare sa mustra dae su 13 de trìulas a su 4 de austu de su 2013 cada die cun custos oràrios: 09.00-13.00 18.00-22.00