Sos Istamentos, parlamentu antigu de Sardigna.

Sos Istamentos, parlamentu antigu de Sardigna.

– de Salvatore Serra –

Sos Istamentos (ispagnolu, Estamentos; italianu, Stamenti) fiat su nùmene de su Parlamentu de su Rennu de Sardigna, formadu dae sos rapresentantes de tres categorias diferentes: bi fiant s’Istamentu eclesiàsticu, s’Istamentu militare e s’Istamentu reale.

S’Istamentu eclesiàsticu, chi costituiat su primu bratzu, fiat formadu dae su cleru: nde faghiant parte sos tres archipìscamos sardos, sos pìscamos, sos abades e sos priores. Sa “prima boghe”, est a nàrrere su presidente, fiat s’archipìscamu de Casteddu.

S’Istamentu militare fiat formadu dae sos cavalieris, dae sos nòbiles e dae sos feudatàrios, chi a sa prima fiant tres categorias distintas: ma giai dae su sèculu XVII totu sos feudatàrios fiant finas nòbiles e (francu chi no esserent fèminas) cavalieris, e belle totu sos nòbiles fiant finas cavalieris; belle gasi, b’aiat unos cantos cavalieris chi non fiant nòbiles e nòbiles medas chi fiant feudatàrios. Prima boghe de s’Istamentu militare fiat su feudatàriu cun su tìtulu prus artu e, a paridade de gradu, su chi teniat su tìtulu prus antigu: de fatu, sos chi ant tentu prus a s’ispissu custu rolu sunt istados su marchesu de Biddesorri e su marchesu de Làconi; àteras bortas b’at àpidu su marchesu de Soléminis (in s’ùrtimu parlamentu “regulare” de su 1698), su marchesu de Villarìos (in s’autocunvocatzione de su 1793) e su marchesu de Albis.

S’Istamentu reale fiat formadu dae sos rapresentantes (chi lis naraiant sìndigos) de sas sete tzitades règias (est a nàrrere, sas tzitades sena feudatàriu: S’Alighera, Bosa, Casteddu, Castillo Aragonés (oe Castelsardo), Iglèsias, Aristanis e Tàtari.

Su parlamentu teniat su podere de autorizare sas tassas; a pustis de su 1721 custu podere at cumintzadu a lu praticare una cummissione de delegados; in su 1847, cun sa “fusione perfeta” est istadu abolidu e sustituidu dae su Senadu Subalpinu; b’at chertu unu sèculu in antis chi sa Sardigna aeret torra, gràtzias a un’Istatutu de autonomia, una casta de  parlamentu a contu suo (1948).

 

ERA ARAGONESA

In su 1355 su re catalanu Pere IV at cunvocadu unu parlamentu de sa nobilesa sarda pro parare fronte a su re de Arbarèe Marianu IV , ma sos nòbiles prus de importu si sunt negados de bi leare parte. Belle gasi, custu est istadu su primu parlamentu sardu. S’esistèntzia de su parlamentu est istada formalizada in sa costitutzione promulgada dae Alfonso V in su 1421: dae tando ant cumintzadu a lu cunvocare cada 10 annos. Membros medas de su parlamentu visitaiant sas Cortes de Catalugna e ischiant bene comente funtzionaiant. Sas Cortes, in càmbiu, non fiant de acordu chi sa Sardigna aeret tentu una giurisdizione sua, e in su 1366 ant pedidu a su re Pere IV de revocare sa lege de esclusividade aprovada in su 1355. Su re s’est negadu de fàghere custu, narende chi non fiat giustu chi sas leges aprovadas dae su parlamentu de unu rennu esserent revocadas dae su parlamentu de un’àteru rennu. Custa detzisione est istada de importu mannu in un’àtera cuntierra de su re cun sos catalanos, sos cales cheriant èssere esentados dae su regìmene doganale sardu: difatis sos catalanos residentes in s’ìsula fiant sugetos a sas leges de su parlamentu sardu.

In su 1420 Alfonso at cunvocadu in Bonifacio una reunione de sos rapresentantes de sos nòbiles, de sa crèsia e de sas tzitades de Còrsica, ma non b’at àpidu un’isvilupu, e su controllu aragonesu de sa Còrsica—chi cun sa Sardigna formaiat su regnum Sardiniae et Corsicae—est bènnidu mancu deretu.

In su 1421, imitende sas Cortes, sos Istamentos ant pedidu de istituire una protzedura de revisione in antis de votare sas tassas . Custu at aumentadu su podere de su parlamentu. In prus, sos Istamentos ant istituidu unu comitadu de tres pessones, una pro cada ramu, pro controllare s’esatzione de sas tassas.

In su 1446, sos Istamentos (o forsis petzi s’Istamentu militare) ant pedidu a Alfonso V su deretu de si reunire sena su permissu de su re. Alfonso, chi forsis no at bidu perunu perìgulu in sa cosa, at naradu chi eja. Su re teniat resone, ca, belle gasi, sos Istamentos non si sunt mai reunidos a contu issoro

A pustis chi est divènnidu re, Ferrando II at ordinadu a su vitzerè Ximene Pérez Scrivá de cunvocare su parlamentu in Aristanis (santandria 1481), in ue dae pagu b’aiat àpidu una rebellia. Su parlamentu pustis nche l’ant istesiadu a Casteddu e a Tàtari. Sa finalidade de custas cunvocatziones fiat de collire dinare—Pérez aiat pedidu una tassa annuale permanente de unu ducadu pro famìlia—pro sa defensa de s’ìsula dae sos Turcos otomanos, chi aiant ocupadu Otranto s’annu in antis. Sa debilesa de su parlamentu sardu s’est bida in custos eventos. A Pérez nche l’ant bogadu pro curpa de una cuntierra cun sos tzitadinos de Casteddu, e nche l’ant torradu a pònnere a pustis de pagu, cando su vitzerè nou si nch’est mortu. Su parlamentu no at protestadu, ne at naradu nudda cando Ferrando l’at cunvocadu in Ispagna, in ue s’es reunidu in Sivìglia e Còrdobain s’atòngiu de su 1484.

Sas elites sardas, chi pro su prus fiant de orìgine catalana, aiant mantesu ligàmenes fortes cun s’Ispagna. In su protzessu-verbale finale de sa reunione in Sivìglia de su 27 de santugaini bi fiat iscritu chi sos “decretos, disponimentos, cummissiones e àteros atos garantidos dae sa Majestade Sua a sos rapresentantes de custu rennu ant a abbarrare suspesos finas a cando sas garantzias de pagare su dinare no ant a èssere publicadas dae sa Majestade Sua in su Rennu de Sardigna”. Ant aprovadu un’esatzione de 150.000 liras, de collire in 10 annos. Si esseret colada sa proposta originale, su guvernu non diat àerer tentu bisòngiu de torrare a cunvocare su parlamentu. Imbetzes l’ant cunvocadu in su 1494 cando sas 150.000 liras nche fiant gastadas. Dae su 1497 a su 1511 sos Istamentos ant tratadu sos afares in una sèrie de sessiones distintas, ponende unu muntone de tempus comente non fiat acuntèssidu mai.

 

ERA ISPAGNOLA

In su sèculu XVI, sos Istamentos ant traballadu prus pagu. Los cunvocaiant cun regularidade cada 9 o 10 annos sceti pro aprovare sas tassas; ma, cando sos costos de sas gherras ant cumintzadu a aumentare a primos de su sèculu XVII, su parlamentu s’est fatu semper prus redossu a aprovare sos donativos rechestos dae su re.

In su 1624–25 sos Istamentos ant fatu meda resistèntzia a sas rechestas de dinare de su re pro pagare sas Gherra de sos Trinta Annos (una resistèntzia sìmigiante a sa chi in su matessi tempus b’est istada in su Parlamentu de Inghilterra e in sas Cortes de Catalugna). In cussa ocasione su vitzerè Juan Vivas at tentu su suportu de sa tzitade de Tàtari e de sos nòbiles chi a su sòlitu fiant residentes in Ispagna, ma at tentu s’opositzione de sa tzitade de Casteddu (rivale traditzionale de Tàtari) e de sos bratzos militares e eclesiàsticu. A unu tzertu puntu Vivas at acuarteradu sordados lombardos in sas domos de sos contràrios pro bìnchere s’opositzione issoro, ma pro su prus est acuntèssidu chi ambas partes imbiaiant lamentas a su Cussìgiu de Aragona in Ispagna

In su 1654–55 b’at àpidu un’àtera cuntierra intre su vitzerè e su parlamentu, custa borta acumpangiada dae disòrdines.

Ma su cunflitu prus grave b’est istadu in su 1665–68, cando sunt istados assassinados siat sa ghia de s’opositzione de sos nòbiles, Augustín de Castellví, siat su vitzerè, Manuel de los Cobos. Su parlamentu— o, a su nessi, sa parte cumandada dae sos nòbiles locales—at cuntestadu su deretu de su re de nominare ispagnolos in sos ufìtzios pùblicos in Sardigna, at defensadu sa gurisditzione nobiliare contra a sas ingerèntzias de sa monarchia, at revindicadu su deretu de sas tzitades de esportare su trigu sena nche lu pònnere in antis in sos depòsitos guvernativos e at pedidu chi su re aeret cunfirmadu totu sos atos aprovados dae su parlamentu. A sa fine at bintu sa monarchia, e sa repressione est istada terrorosa: sos capos de s’opositzione sunt istados giustitziados e sas concas issoro espostas in sas turres de Casteddu.

S’ùrtima borta chi sos Istamentos sunt istados cunvocados suta de su guvernu ispagnolu est istada in su 1697, cando bi fiat Carlos II. Sa sessione est durada fintzas a su 1699. Est istada s’ùnica borta chi su parlamentu at minimadu su donativu in antis de l’aprovare.

 

ERA SAVOJARDA

In s’ època bullugiada chi andat dae su 1700 a su 1720- chi includet sa Gherra de Sutzessione Ispagnola (1701–14) e s’ Alliàntzia Cuàdrupla (1718–20) – , sos Istamentos non sunt istados cunvocados. Semper e cando, s’esistèntzia issoro est istada assegurada dae sas cunditziones de sa tzessione de su rennu dae s’Ispagna a sos Ducas de Savoja .

In su mese de austu de su 1720, Saint-Rémy, su vitzerè de su re nou Vittorio Amedeo II, at cunvocadu sos Istamentos pro lis fàghere giurare fidelidade a sa monarchia e aprovare sas tassas. A primos de su 1721 los ant torrados a cunvocare pro aprovare tassas de emergèntzia pro parare fronte a sa peste bubònica. Custa est istada s’ùrtima cunvocatzione regulare. Dae tando ant cramadu sceti una cummissione de delegados pro ratificare sas tassas giai aprovadas, e custu lu faghiant cada tres annos. Custu at postu sa Sardigna in lìnia cun sos àteros Istados de sa Domo de Savoja, francu su Ducadu de Aosta, in ue bi cheriat semper s’aprovatzione de su parlamentu pro coberare sas tassas.

In fines sos Istamentos si sunt autocunvocados in su tempus de sa Revolutzione Sarda: est custu organismu chi, in su 1793, at elaboradu sas “chimbe dimandas” de presentare a su re:

Cunvocatzione de sas cortes generales pro tratare totu sos ogetos de bene pùblicu

Sa cunfirma de totu sas leges, usos e priviègios de su Rennu de Sardigna.

Sa privativa de sos impreos pro sos sardos (francu pro sas càrrigas istitutzionales prus artas).

S’istitutzione de unu Cussìgiu de Istadu chi cheriat cunsultadu in totu sos afares chi in antis dipendiant dae s’arbìtriu de unu segretàriu ebbia.

Unu ministru distintu in Torinu pro sos Afares de Sardigna.

A pustis de sa repressione de sa Revolutzione Sarda sos Istamentos non si sunt prus reunidos e, cun sa “fusione perfeta” de su 1847, sunt istados abolidos.

Ligàmenes: https://en.wikipedia.org/wiki/Stamenti

https://it.wikipedia.org/wiki/Stamento

http://siusa.archivi.beniculturali.it/cgi-bin/pagina.pl…

https://it.wikipedia.org/wiki/Stato_sardo

http://www.iconur.it/sto…/2-la-sarda-rivoluzione-1793-1796

 

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *