Su Covid in Sardigna est torrende in dae segus. In s’ìsula nostra b’at sos datos mègius de s’Istadu italianu: su Rt est a 0,7 su prus bassu e fintzas sos malàidos pro chentu mìgia abitantes, chi est a barantunu, est prus bàsciu de sos balores de sa zona groga. Difatis, sos nùmeros sunt de zona arba e petzi pro neghe de sas règulas e de sos paràmetros semus abarrende colorados.
Como sas Regiones, e sa Sardigna est sa prus tzèrrima, sunt faeddende cun su guvernu pro mudare sas règulas e sas medidas collegadas a sos livellos diferentes. S’idea est cussa de pònnere a banda su ìnditze Rt, ca at ammustradu chi non balet inditende su perìgulu: su chi ammustrat, difatis, est cantu sunt contagiosos sos malàidos, ma sena contare cantos sunt de a beru sos malàidos. Sa punna de sas Regiones est de pònnere atentu prima de totu a su gradu de prenadura de sos repartos Covid e su nùmeru de malàidos pro chentu mìgia abitantes. Si una riforma gasi at a passare, sa Sardigna at a intrare deretu in zona arba e forsis a bi abarrare prus de prima.
Gabriele Tanda
Leave a comment