Su 22 de làmpadas sa Fundatzione “Salvatore Cambosu” e sa Comuna de Oroteddi ordimingiant sa presentada de su progetu numenadu “Radici” chi at sa punna de presentare s’iscritore e giornalista oroteddesu pro mèdiu de autores diferentes e de immàgines de sa Sardigna antiga.
Cambosu at traballadu pro giornales che a La Nuova Sardegna, Il Tempo, L’Avvenire d’Italia, Il Giornale d’Italia, L’Unione Sarda, ma est connotu mescamente pro esseret s’iscritore de “Miele amaro”, una filera de 87 contos in ue s’antropologia si aunit cun sa poesia e s’istòria.
Sa Fundatzione chi est intitulada a issu est nàschida in su 2007 cun s’agiudu de sa Regione Sardigna e de sa Comuna de Oroteddi cun s’idea de promòvere atividades e fàghere connòschere s’òpera de Cambosu.
Intre de custas atividades, su 22 de làmpadas a sas 18.30, in su Tzentru Polivalente de Oroteddi, b’at a èssere una manifestatzione cun unu programma de sustàntzia.
S’at a comintzare cun su film – documentàriu “Radici” e a sighire b’at a èssere sa presentada de su volume “Cambosu – Le Radici”. Ant a faeddare Nannino Marteddu, su sìndigu de Oroteddi, Frantziscu Casu, regista, Cristina Lavinio, dotzente universitària, Irene Bosu e Eleonora Frongia, mentres sos concruos ant a tocare a Antonello Menne, chi at contivigiadu su progetu, Simone Tatti chi est su moderatore e Gavinu Pòddighe, atore, chi at a lèghere carchi bìculu de òpera iscrita dae Sarvadore Cambosu.
Una serana de cultura pro iscobèrrere sas raighinas istòricas e geogràficas de unu sardu de Oroteddi.