Eris a mangianu una delegatzione de s’Assòtziu Su Majolu at addobiadu su Retore de s’Universidade de Tàtari Attilio Mastino pro pedire s’impreu de sa limba sarda in intro de s’Universidade.
Si s’annu coladu Su Majolu aiat presentadu una petitzione firmada dae milli istudiantes de s’universidade, pro pònnere duos cursos de làurea noos pro formare maistros e professores de limba sarda pro sas iscolas primàrias, mèdias e superiores e pro pònnere unu esàmene de sardu in cada cursu de làurea, ocannu at presentadu una petitzione pro pedire s’istitutzione de un’esame de sardu in totu sos cursos de làurea de cada dipartimentu de s’Universidade de Tàtari; sa domanda est istada firmada dae prus de 700 istudiantes iscritos a s’ùrtimu annu de sas iscolas superiores de Sardigna.
Dae su comunicadu de imprenta de s’Assòtziu resurtat chi “su Retore at cunfirmadu chi s’Universidade est isetende s’aprovatzione dae sa Regione de su progetu FILS (cursu pro formare professores de limba sarda) in ue nessi sa metade de sas oras ant a èssere in limba sarda, comente pedit s’Assessoradu a sa Cultura.”
S’assòtziu ammentat fintzas chi in su 2011 su progetu fiat istadu abbotzadu ca custu critèriu non fiat rispetadu.
Attilio Mastinu at apasiguadu sos pitzinnos narende.lis chi s’at a impignare pro “pònnere deretu unu esame de limba sarda nessi in sos dipartimentos umanìsticos de s’Universidade de Tàtari.”
S’Assòtziu Culturale Su Majolu est un’assòtziu de istudiantes chi gherrant in sas universidades e in sas iscolas de Sardigna pro s’emancipatzione polìtica, econòmica, sotziale e culturale de su pòpulu sardu: sa punna sua est sa de lòmpere a su bilinguismu perfetu (sardu-italianu) in intro de sas Universidades e de sas iscolas de Sardigna, ma fintzas cussu de pònnere a su matessi livellu sas limbas sardas alloglotas (Aligheresu, Gadduresu, Tataresu, Tabarchinu) in sas comunas de s’ìsula in ue sunt faeddadas. Impreare su sardu in cada àmbitu de sa bida est pro custos giòvanos de importu mannu “pro sa crèschida de sa cultura e de s’economia in Sardigna, ca su bilinguismu est ocasione de traballu, ma fintzas ca isorbet sas cadenas chi ligant galu su pòpulu sardu a s’antigu sensu de inferioridade.”
Issos l’ant cumpresu; tocat de bìdere si lu cumprendent fintzas sos acadèmicos de s’Universidade.