Su cuncursu “Tzitade de Tàtari” at lòmpidu sos 5 annos

-de Domitilla Mannu-

iscola_posada

Est istada una festa bella e prena de cuntentesa sa tzerimònia de premiatzione de sa de 5 editziones de su Prèmiu de Literadura in limba sarda “ Tzitade de Tàtari”, intregadu a sos istudiantes de s’iscola de s’òbligu, ammaniadu dae s’assòtziu Pro no ismentigare.  Chenàbura 27 de maju, sa sala Angioy de su palatzu de sa Provìntzia de Tàtari s’est prenada cun sa presèntzia de prus de chentu pitzinnos acumpangiados dae sas maistras, professoras  e espertos chi los ant sighidos in sas letziones de sardu in iscola. Sa giuria, cumposta dae Istèvene Arru, Luisella Budroni, Piergiuseppe Branca, Mariantonia Fara e Bonaria Mazzone, at pretziadu meda sos traballos de  sos pitzinnos chi, mescamente in sa poesia, ant mustradu sensibilidade e fungudesa de sentidos  isvilupende argumentos sèrios e de atualidade comente   in  sa poesia “Sos migrantes” de Adele Cherchi (1^ mèdia de Bunnànnaru) chi at bìnchidu su primu prèmiu paris cun Angela Sechi de IV elementare de Santu Lussurgiu cun “ Tia cherrer esser”,  una poesia de argumentu  intimìsticu.

Sende bona sa calidade de sas poesias, est istadu  difìtzile pro sa giuria a seberare sos primos tres prèmios chi, difatis, sunt istados assignados totu ex aequo, paris cun bator mentziones.  Sos pitzinnos ant dadu proas bonas fintzas in sa  prosa. Sa 1^ classe de s’iscola mèdia de Santu Aingiu at bìnchidu su primu prèmiu cun unu traballu abbistu e sàbiu, iscritu in unu sardu bene contivigiadu, chi tratat de sos giogos de eris cumparados cun cussos de oe.

Su prèmiu ispetziale est andadu a sa IVC de s’iscola primària de S. Giuseppe de Tàtari pro su giornaleddu “Fabedda”, chi est su resumu de unu progetu isvilupadu in s’ìnteri de s’annu iscolàsticu. Oto sunt sas fainas premiadas in sa setzione de sa prosa. Sos pitzinnos ant lèghidu sas òperas issoro cun tràgiu dèchidu e cun una padronàntzia bona de sa limba, calicunu s’est fintzas cummòvidu e cando su cantautore Franco Sechi at cantadu “Ajò e “Cando fimus nieddos nois”, si sunt iscadenados ballende. A s’ora de si nch’andare nos ant saludadu cun su risu in cara cun sa promissa de nos torrare a bìdere pro un’àtera festa de sa limba e de sa poesia.

premiatzione cuncurs2016

Amus pretziadu meda sa presèntzia de mamas e de babbos bènnidos dae S. Lussurgiu, S. Aingiu, Bunnànaru, Thiesi e Tàtari, chi ant chèrfidu èssere presentes e nos ant torradu gràtzias pro su traballu chi faghimus pro sa limba sarda.

S’assòtziu “ Pro no ismentigare” ammàniat custu cuncursu sena agiudos econòmicos de entes pùbblicos o privados e non cuamus chi diamus chèrrere fàghere carchi cosa in prus ma, a dolumannu, semus custrintos a fagher sos contos cun sa realtade e cun fortzas chi tenimus. Mancari gasi,  in su pagu nostru, nois sighimus cun amore e bona voluntade a tènnere sa làntia inchesa, proende a fàghere carchi cosa de giudu a proe de sa limba nostra.

Domitilla Mannu

                                                                                                          Presidente de s’assòtziu “ Pro no ismentigare”

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*