Su Sòtziu pro sa tutela de sos deretos de sos Sardos at presentadu sas dies coladas unu ricursu contra a sa lege eletorale pro sas votatziones europeas. Sa punna est su reconnoschimentu de unu deretu nostru: èssere rapresentados in Europa comente pòpulu e comente minoria linguìstica, cunforma a sa lege italiana 482/99 (mai praticada) e a sa Carta Europea de sa minorias linguìsticas de su 1992 (chi s’Itàlia no at galu ratificadu).
Su ricursu at a èssere discùtidu su 11 de abrile in su Tribunale de Casteddu, pro chi a sas eletziones imbenientes siat reconnòschidu su deretu nostru a eligire un’ europarlamentare de sa Sardigna, sena isetare chi depat rinuntziare su chi est istadu eligidu in Sitzìlia, pro bi fàghere intrare su sardu. Sa faina giuditziària depet èssere acumpangiada, a bisu de su Sòtziu, dae una faina polìtica chi pòngiat una lista sarda a costàgiu de unu partidu italianu: “50.000 votos diant bastare pro eligire su rapresentante de sa lista sarda ca diat pigare su postu de s’ùrtimu de sa lista natzionale”.
Chi siat su primu passu pro unu reconnoschimentu berdaderu de sa minoria linguìstica sarda?