Puru sos inimigos istoricos de sa limba sarda si sun reunidos a cunvegnu. Est sutzedidu in Nugoro pro initziativa de su Istitudu Regionale Etnograficu. Dae su titulu de su quotidianu sardu, semper contra sa limba sarda, s’idet sa complicidade culturale sua ca si narat chi s’identidade sarda est una “gabbia” chi si depet brincare pro atzetare sa colonizatzione in limba italiana.
Non tenet responsabilidade, est innocentes meda zente de gabale, amantiosa de sa limba sarda, chi at partecipadu in fide bona a sa Die de sa Sardigna e chi sun istados trampados dae parte de sos sos organizadores chi cherian diffundire unu messagiu contra sa limba sarda.. Sigomente sa limba sarda, sutta s’ispinta de s’opinione publica chi semper de pius est favorevole a s’ufitzialidade sua e a su bilinguismu faghen finta, cun su trasformismu a s’italiana, de esser favorevoles fintzas sos inimigos giurados dae sos tempos de s’initziativa de leze populare subra su bilinguismu, cando negaian puru s’esistentzia mattessi de sa limba sarda o professores chi oe in s’Universidade de Tattari cheren imparare su sardu in limba italiana. Faghen sos furbos pro si parrer aderentes a sa batalla pro sa llimba sarda e pro la giogare a istoccadas cun sos peus argumentos issoro traidores.
Ma su velenu contra sa limba sarda chi tenen in sas intragnas est bessidu a campu in sas peraulas issoro finales.
At dichiardadu su Prof. Clemente, inimigu giuradu de sa limba sarda, de s’ufitzialidade e de su bilinguismu dae semper, tancande s’atobiu a pustis de una tramposa argumentatzione: “E questo significa che il fatto della lingua non è determinante per vivere la propria identità”.
Sos inpiccababbos chi sun contra sa limba sarda ana dae meda seberadu de essere mortores de sa limba sarda e pro issos andat bene sa colonizatzione italiana, ca pro issos sa limba italiana no est comente pensat su movimentu linguisticu, sa limba de s’Istadu, sa limba de sa tzittadinantzia, a sa cale depet essere posta afacca cun su dirittu de paridade sa limba sarda natzionale cun su bilinguismu e s’imparu in tottu sas iscolas e universidades e in sa vida publica e in sos mass media. Pro custos falsos inteletuales sa limba italiana depet colare in d’una manera esclusiva in su logu de sa limba sarda chi est sa limba de sa Natzione sarda e chi tando at a morrer , ca sene limba no b’at natzione.
Pro nois pro s’identidade natzionale de sos sardos est indispensabile sa limba sarda no ca est unu dirittu tzivile collettivu ebbia, ma fintzas ca est sa base de su dirittu a s’autodeterminatzione natzionale e a s’indipendentzia e a sa libertade sotziale, economica e ispirituale de su populu nostru dae troppu tempu colonizadu.
