Sos 10 puntos de Casteddusardu

IMG_9359
VIII Cunferèntzia Regionale de sa Limba Sarda

“Amus trateadu unu surcu e oramai non si podet prus torrare in segus, chie si siat chi bincat”.

Cun custas paràulas Sergio Milia, assessore regionale a sa cultura, at abertu sa de VIII Cunferèntzia regionale de sa Limba Sarda, in Casteddusardu.

E est a beru. De caminu nd’at fatu meda sa limba sarda dae deghe annos a como. Semus colados dae sas paràulas e dae s’ideologia identitària a su traballu in su territòriu, in s’iscola, in sos mèdio massivos, in internet, in sa pùblica amministratzione. Est mudada sa cussèntzia de sa gente.

“Amus fatu meda ma si podet fàghere de prus puru e mègius” at naradu Milia. E semus de acordu.

E chi sa chistione linguìstica siat istratègica l’at sutalineadu su presidente Cappellacci puru, intervènnidu a sa Cunferèntzia. “Dare dignidade a sa Limba Sarda cheret nàrrere a la cunsiderare normale, a nche la bogare dae s’acorru de s’antigòriu”.

Un’àndala duncas est istada aviada. Ma ite fàghere in su benidore?

Ugo Cappellacci at elencadu 10 puntos:

1. mantènnere in su bilantzu sos istantziamentos in favore de sa polìtica linguìstica;

2. mandare a dae in antis sa modìfica costitutzionale de s’Istatutu Sardu pro acumprire sa coufitzialidade italianu-sardu;

3. gestione regionale de sas polìticas iscolàsticas e universitàrias;

4. perfetzionare, ufitzializare e isparghinare sa limba iscrita istandard in onni àmbitu, ca est netzessària pro pòdere mandare a dae in antis una polìtica linguìstica de profetu, sena pònnere a un’ala sas faeddadas locales;

5. potentziare sas istruturas regionales chi traballant pro mandare a dae in antis sas polìticas linguìsticas; afortiare sa collaboratzione cun sos entes locales; potentziare e istabilizare sa retza de sos operadores linguìsticos e de sos ufìtzios de sa limba sarda chi ant a èssere gestidos dae sa Regione;

6. fàghere nàschere una Fundatzione regionale chi contiviget sa chirca iscientìfica e sos programmas operativos chi pertocant sa polìtica linguìstica in collaboratzione cun ateneos internatzionales;

7. valorizatzione de sas atividades artìsticas traditzionales chi impreant sa limba sarda;

8. pari dignidade a sas limbas alloglotas presentes in Sardigna (tabarchinu, turritanu, gadduresu, catalanu de S’alighera);

9. mandare a dae in antis sa polìtica de finantziamentu a sos mèdios massivos chi impreant sa limba sarda in sa programmatzione issoro;

10. mandare a dae in antis e sustènnere s’insegnamentu de su sardu in oràriu curriculare, sa formatzione de sos insegnantes; istituire un’albo de sos insegnantes de sardu e contivigiare sos pianos triennales de sa limba prevìdidos dae sa Lege regionale 26/97.

S’impinnu de Cappellacci est de acumprire custos 10 puntos in sos annos de guvernu imbeniente, pro mandare a dae in antis sa polìtica linguìstica giai incarrerada in sos primos chimbe annos de guvernu regionale.

Ma sa chistione de sa limba est “trasversale”, nche bàrigat sas lògicas de partidu e de sos ischieramentos polìticos. Est una chistione chi pertocat totu sos sardos, est ligada a nodu mortu cun s’identidade de su pòpulu sardu. E diat èssere ora chi totus nàrgiant a boghe manna, mescamente sos polìticos chi si sunt candidende a guvernare sa Sardigna, si sunt in favore o contràrios.

Sergio Milia
Sergio Milia

IMG_9386

IMG_9410
Ugo Cappellacci

IMG_9391

Antoni Nàtziu Garau
Antoni Nàtziu Garau
Fabrìtziu Dettori
Fabrìtziu Dettori
Bustianu Pilosu
Bustianu Pilosu
Clara Farina
Clara Farina
Antoni Deiara
Antoni Deiara
IMG_9465
Piero Marras
Maria Giovanna Cherchi
Maria Giovanna Cherchi

Antonio Mauro Conti
Antonio Mauro Conti