B’at tempus finas a fine chida pro leare parte a unu de sos addòbios de “Sas dies de sa limba sarda”, faina in prus dies promòvida e tremesada dae sa Provìntzia de Aristanis pro sa die Europea de sas Limbas, chi est a sa de tres editzione.
“Non b’at birgòngia a impreare sa limba nostra, chi est sa de sos mannos nostros e chi si faeddaiat in domos nostras finas a gianteris” at naradu s’Assessore de sa cultura de sa Provìntzia de Aristanis Serafinu Corrias.
Pro sa Provìntzia su progetu l’at contivigadu s’Ufìtziu provintziale de sa limba e de sa cultura sarda, abertu dae s’ente in su 2004, e de giudu est istadu su de àere traballadu paris cun s’Universidade de Casteddu e cun su Tzentru de sos servìtzios culturales UNLA.
“Su bilinguismu dae minores mustrat chi sos pitzinneddos bilìngue sunt prus ispibìllios e prus dispostos a aprèndere – ispricat s’espertu de limba sarda Antoni Garau- su sardu no est chistione de betzos cauddos, est unu bantu e cheret impitadu che a cada àtera limba.”
In Terrarva. Ilartzi, Bosa, Làconi e in sa sea de sa facultade de lìteras in Casteddu, s’ant a fàghere una muda de addòbios e cunferèntzias a pitzu de s’importu de sa limba sarda, e su programma si podet iscarrigare in su situ www.dischente.or.it.
In su matessi situ si podet agatare su calendàriu de sas letziones chi s’ant a fàghere in sas àulas de su Consìgiu de sas Comunas de Santa Giusta, Ardaule, Samugheo, Aristanis, Iscanu, Marrùbiu, Santu Lussurzu, Bauladu, Làconi, Uras, Bosa e Ales.