Sos mèdios de comunicatzione de sa Sardigna ant chistionadu meda custas dies de Riccardo Làconi, unu pitzinnu chi at seberadu de fàghere sos ùrtimos esàmenes de tertza mèdia in s’Istitutu Alfieri de Casteddu in sa limba sua, su sardu. Su pitzinnu at faeddatu de Emìlio Lussu, de David Herbert Lawrence e de bioedilìtzia. S’ùrtima nova est chi sa votatzione chi l’ant dadu est de 10. Fintzas in sa retza sotziale de Facebook si notat su gosu de sa gente pro custa nova: si nde chistionat che a unu passu mannu pro sa limba sarda in sas iscolas. E forsis lu est de aberu.
Ma si a un’ala bat de gosare pro s’ànimu e s’issèberu chi at fatu Riccardo, a s’àtera b’at de si pònnere a tìmere. “[…] ieri mattina ha sorpreso ed entusiasmato la commissione d’esame”: petzi ca at faeddatu in sardu? Si meledamus unu pagu nos sapimus chi semus a su puntu chi nos semus ispantende de unu pitzinnu chi faeddat in sa limba pròpia. Si fiamus istados in una situatzione de normalidade de sa limba sarda, a su lèghere sa nova “Dà in sardo l’esame di terza media” sa reatzione normale diat èssere istada “E tando?”.
E imbetzes semus restados incantados ca nos abbalaucat chi unu pitzinnu potzat chistionare in sardu in sas iscolas; chi unu pitzinnu de trèighi annos siat a tretu fàghere s’esàmene in sardu.
L’ammentades su vocàbulu, su contigheddu de “ite abistos sos pitzinnos inglesos: a tres annos ischint faeddare s’inglesu!”?. Gasi semus faghende nois pro custa nova…