de Giuseppe Pepe Coròngiu –
In su 2008 si fiat lòmpidos a unu resultadu istòricu: su sardu impreadu in sas trasmissiones RAI. Nessi in sa ràdiu, a oras, in unas cantas dies a sa chida. Pagu, ma unu sinnale de avantzamentu. Como, su sardu in Radio Rai regionale non s’intendet prus e lego in sos giornales sas lìteras de chèscia de operadores, sindacados e intelletuales. Sa Regione no at firmadu sa cunventzione. Ma comente est pòtzidu acuntèssere?
M’ammento galu cussu beranu de su 2008 cando su diretore regionale rai de tando Romano Cannas e s’assessora de sa pùblica istrutzione Maria Antonietta Mòngiu fiant gherrende cun sa RAI pro otènnere custos ispàtzios. Renato Soru aiat fatu sa Limba Comuna dae duos annos, ma sa chistione de su sardu si fiat unu pagu sessada. S’assessora Pilia si nche fiat andada (in fatu a Pigliaru) e s’assessoradu fiat abbarradu “ad interim” sena ghia pro tempus. Tando fiat lòmpida Maria Antonietta Mòngiu chi l’aiat dadu un’impèllida noa. E m’aiant pedidu de dare una manu de agiudu “amministrativu” in custa chistione de sa RAI sende ca, chie fiat prepostu, non faghiat propostas ùtiles e agradessidas dae sa polìtica.
M’ammento sas riuniones e finas sos viàgios a Roma in su Ministèriu (tando su ministru de Comunicatzione fiat Gentiloni) e sa bìnchida manna de àere otentu cussos ispàtzios tràmite una cunventzione cun sa Rai Regionale a càrrigu de sa Regione. Posca mi fiat dispràghidu meda de non l’àere mai pòtzida gestire custa cunventzione ca fiat istada assignada a àteros ufìtzios, sos matessi chi no aiant agatadu sa solutzione amministrativa a su problema.
Ma, a banda custu, apo sighidu unu pagu custos annos sas trasmissiones, a bortas m’ant finas cumbidadu creo a faeddare, e in generale si podet nàrrere chi non fiat mala sa presèntzia de su sardu in sa Rai regionale. Tzertu, su folclorismu e sas cuntraditziones non mancaiant. A intèndere a Giulio Angioni faeddende in sardu (contra a sa polìtica linguìstica oviamente) in un’ispàtziu balangiadu cun su suore de cussos chi issu at semper grisadu e gherradu, no est istadu bellu. E trasmissiones comente cussas de Bandinu, Cubeddu e Sanna, paris cun cosas bonas, aiant in intro finas unu muntone de istereòtipos a istracu baratu. Gasi comente, sa letura de libros intreos o òberas teatrales in sardu, penso chi aeret dromidu finas a militantes che a Simon Mossa….
Ma, sas cosas si non si faghent, non si podent criticare e su nudda est semper pejus de su pagu. De seguru su sardu in Rai fiat una cosa positiva. Cristina Maccioni, pro nde mentovare una, at traballadu comente una maca custos annos pro dare dignidade a custu investimentu.
Como bido chi, intro de milli chistiones chi sunt derruende, finas custa non resesset a leare tretu. Cando nde faeddas cun sos interessados ti dant respostas chi non cumprendo e chi mi parent masochìsticas. A sa fine, mancu mi interessat su pro ite: su chi mi dolet est custa òbera de distrutzione sighida chi paret chi no apat birgòngia mancu de si giustificare.
E nemos chi si impitzat prus de su Cuntratu de Servìtziu Rai chi podet èssere sa leva giusta pro custrìnghere s’ente radiotelevisivu a pònnere issu su dinare e a fàghere sas trasmissiones.
Ma pranghende gasi non faghimus àteru chi torrare a su contu ischizofrènicu de sa Carta Europea e de sas normas de atuatzione: comente podimus èssere credìbiles cun s’Istadu si semus nois sos primos a ochìere sa limba nostra e a non la promòvere comente si tocat?
sa foto de Maria Antonietta Mongiu, assessora de sa limba in su 2008 est leada dae
Leave a comment