Su “sedicente” sardista-indipendentista Paolo Maninchedda est oramai a sa sola in intro de su Partidu Sardu pro sa chistione de sa limba sarda. In s’Iscola de Istiu, aparitzada dae su Partidu Sardu in s’Argenteria sas dies coladas, est essidu craru e ladinu su pensu sardista in chistiones de polìtica linguìstica. Sa lìnia no est cudda de Maninchedda e mancu cudda de tzertos iscontzadores de su Psd’az de Casteddu, semper prus delegitimados finas dae sos resultados eletorales.
In s’addòbiu chertu e ammaniadu a manera galana dae Micheli Pinna, esponente tataresu-bonesu de su Partidu, sunt intervennidos siat su secretàriu de su partidu Giovanni Colli, siat su Presidente Giacomo Sanna e petzi custas presèntzias ant dadu unu messàgiu craru a sos militantes de su partidu: Maninchedda, cando faeddat de limba, lu faghet a tìtulu pessonale ebbia. Colli at fatu de prus: at isparghinadu unu comunicadu in ue narat chi b’at bisòngiu de unu istandard pro sa limba amministrativa e chi sa Regione depet fàghere de prus pro sa limba.
Est un’imposta bene dada, dae Micheli Pinna, pustis chì Maninchedda, pro defensare s’universidade tataresa, aiat ativadu totu unu muntone de fainas polìticas, a craru e cuadas, de pressione contra a s’Ufìtziu Regionale de sa limba, su diretore, sos pianos triennale e totu su Movimentu Linguìsticu.
Resone? Ca su diretore de s’Ufìtziu s’est atrividu a dennegare sos progetos de sos acadèmicos chi cheriant fàghere, pro 750 mìgia èuros, sa formatzione de sos insegnantes sena faeddare mai su sardu. E tando cheriat iscutu e imboladu a terra. Maninchedda, chi est filòlogo, est contra a sa limba sarda, ca comente totu sos filòlogos sardos la cheret morta de istudiare comente su gregu e su latinu. Est duncas unu innimigu “naturale” de su Movimentu Linguìsticu.
Sos traballos, coordinados dae Micheli Pinna de s’Istitutu Bellieni de Thàthari, ant registradu un’interessu mannu de su pùblicu. Diferentes sas propostas fatas dae sos relatores, chi pertocaiant sa polìtica culturale de sa Regione, sos mèdios de comunicatzione e sas solutziones pro nch’eliminare sos problemas chi tenent sos programmas de tutela e salvaguàrdia de sa limba sarda.
Segundu Mario Carboni est arribbadu su momentu de pensare a un’Universidade Lìbera Sarda, comente ant fatu in aterue, finas in Itàlia. Pro sa chistione linguìstica ant cunfirmadu ca s’istandard propostu dae carchi annu dae sa Regione, mancari in fase isperimentale e in evolutzione, s’est dimustrende un’aina profetosa chi est funtzionende mescamente in ambiente istitutzionale, chi fiat sa meta sua naturale, comente at testimoniadu Adriana Cocco, operadora de isportellu de Nughedu.
In realidade su problema de una koinè linguìstica at semper caraterizadu sa cultura isulana. E su bisòngiu de règulas de iscritura comuna a totu sos sardos fiat giai presente in sos sèculos colados, comente at ispricadu Micheli Pinna, chi at ammentadu a su thatheresu Girolamo Araolla chi in su ‘500 aiat fatu giai un’operatzione de custa genia.
Diegu Corraine difatis at sutaliniadu chi un’iscritore est su primu istandardizadore. Como s’obietivu est sa coufitzialidade: est a nàrrere ca su sardu depet èssere cunsideradu dae s’Istadu e dae sos entes pùblicos a su matessi livellu de s’italianu e depet agatare s’ispàtziu istitutzionale suo finas in iscola e in s’imparu curricolare de ogna òrdine e gradu.
Oe su sardu tenet un’interessu mannu in sos mèdios de comunicatzione puru, comente ant testimoniadu Luca Foddai e Gianni Muroni, responsàbiles de SARdies, Frantziscu Cheratzu, editore de Condaghes, e Tonino Bussu de Radio Nuoro Centrale. Abarrat una pregonta, fata dae Corraine: pro ite in Malta, cun 400 mìgia abitantes, bi sunt 4 cuotidianos, 2 in inglesu e 2 in maltesu e in Sardigna custu non càpitat?
Leave a comment