Pittau: 60 annos faeddende de sardu in italianu

Pittau: 60 annos faeddende de sardu in italianu

de Martine Faedda – 

Martine Faedda

Martine Faedda

Immaginade unu linguista italianu chi, in totu sa vida sua, pùblicat e iscriet de limba italiana ma petzi in ……..Inglesu. Ite si podet pensare? Malàidu de internatzionalismu? Non li praghet sa limba sua? O li praghet ma non bastante pro la pensare comente limba normale? Custas cosas, ais a pensare bois, non sutzedent in su mundu reale. E imbetze nono. In Sardigna sutzedet, làstima!

Leamus a esempru su famadu prof. Massimu Pittau, sardu nugoresu. Isse nos ammentat chi, prus de totus is àteros, est cussu chi  at publicadu unu muntone de òperas a pitzu de sa limba sarda. Bene!. Ma in cale limba at publicadu? In sardu? Mancu pro sonnu! Petzi in Italianu!!! Raju! 60 annos de publicatziones chistionende de limba sarda ……..in italianu! E in ue mai si podet bidere cosa gasi in su restu de su mundu.
Si est beru chi professor Massimu Pittau at iscritu de limba sarda, belle che semper in italianu, a nois abarrat una curiosidade manna però. Proite no at mai impreadu sa limba sua? Malàidu de italianismu? Non li praghet sa limba sua?  O li praghet ma non bastante pro la pensare comente limba normale?

Nois forsis lu cumprendimus. Difatis iscriere in sardu est un’atu polìticu. Cando iscries in sardu deves faghere unu seberu. Su primu est: comente iscrio? Cale manera impito? Ca iscriere in una limba, pònnere a campu bideas, sentidu, impreare is regulas suas est un’àtera cosa. E tando essit a fora deretu sa chistione de s’istandard.
Ponende a un’ala, pro un’iscuta s’idea sua de duas istandard (Logudoresu e Campidanesu, sic!) si custu famadu professore aiat iscritu in sardu fiat istadu craru cale podiat èssere s’idea sua de “sardu”. Cale istandard li fiat agradadu? Su Logudoresu? O su Nugoresu? E cale Logudoresu? Su de Sèneghe? O su Lurisincu? O li praghet su “Campidanesu”? E cale Campidanesu? Su Casteddaju? O cussu de Seui? E cussos de Meana? Ite faghent, su referendum pro detzire si bolent unu o s’àteru? E comente faghimus a l’ischire nois, si no at mai iscritu in sardu custu professore famadu .

E si aiat iscritu in limba si podiat faghere finas un arresonu. Nos podiat finas praghere su seberu suo. E imbetze no! Ca s’istandard prof. Massimu Pittau giai bi l’at e si cramat: limba italiana.

E como, a 90 annos, si ponet finas a faeddare male de cussos chi ant proadu a istandardizare custa limba, linguistas che a isse e totu. Ant proadu a faghere su chi totus is ateros populos ant fatu pro sa limba issoro. “Pasticcioni”, los cramat a custos linguistas e nos lu narat in italianu, craru. Betze birgongia!

Professor Massimu Pittau, nde semus istracos de ditzionàrios e grammàticas bonas pro prenare calàscios chi niunu aberit prus. Giai l’ischimus chi sa “carota” si narat “fustinaga”. Gràtzias pro su chi ais fatu ma nois cherimus iscriere de sardu, in sardu. Amus bisòngiu de ischire comente lu faghere, in sas iscolas mègius e in is medias finas.

E cando iscriimos cherimus esplicare bideas, sentidu, faghere arresonos, finas brigare, ma in sardu, pro praghere.

Leave a comment

2 Comments

  1. Ben’agattadu inoghe a quant’annos sias, onzi die de sanos chistionos, in limba sarda sa menzus compresa .

  2. Falar de sardo em sardo,escrever em sardo, cantar em sardo.
    Publicar videos em sardo, publicar noticas em sardo,… viver a língua sarda!

Send a Comment

S'indiritzu email tuo no at a èssere publicadu. Is campos pedidos sunt signados *